Hayvonga mingan xotin . - Yuhannoga Xudo yuborgan Vahiy 17 - bob

Vahiy

17 - Bob

Hayvonga mingan xotin
1 - oyat - Yetti kosali yetti farishtadan biri kelib, menga shunday dedi: “Bu yoqqa kelgin, ko`p suvlar bo`yida o`tirgan buyuk fohishaga chiqarilgan hukmni senga ko`rsataman.
2 - oyat - Yer yuzi shohlari u bilan fahsh qilardi, yer yuzida yashayotganlar uning zino sharobidan mast bo`lardilar”.
3 - oyat - Bundan keyin farishta meni Ilohiy Ruh ta´sirida cho`lga olib keldi. U yerda yetti boshli, o`n shoxli, kufrona nomlar bilan to`lib-toshgan qip-qizil bir hayvon ustiga mingan xotinni ko`rdim.
4 - oyat - Xotin qip-qizil, arg`uvon kiyimda, oltin, javohirot, marvaridlar bilan bezangan edi. Uning qo`lida iflosliklar bilan, zino haromliklari bilan to`lib-toshgan oltin kosa bor edi.
5 - oyat - Xotinning peshanasida uning ismi yozilgan edi: “Sir: buyuk Bobil ― yer yuzi fohishalari va haromliklari onasidir”.
6 - oyat - Xotin Xudo azizlari qonidan, Iso shohidlari qonidan mast bo`lganini ko`rdim. Uni ko`rib, g`oyat darajada hayron bo`ldim.
7 - oyat - Farishta menga dedi: “Nima uchun hayratga tushding? Men senga xotinning va uni ko`tarib yurgan yetti boshli, o`n shoxli hayvonning sirini aytib beraman.
8 - oyat - Ana, sen ko`rgan hayvon bor edi, endi yo`q. U ko`p o`tmay tubsizlik qa´ridan chiqib, halokatga yo`liqadi. Yer yuzida yashayotgan va dunyo yaratilgandan buyon hayot kitobiga yozilmagan barcha odamlar hayvonni ko`rib, hayron qoladilar. Chunki u bor edi, hozir yo`q, ammo yana keladi.
9 - oyat - Buni anglamoq uchun o`tkir aqlu idrok darkor. Yetti bosh ― xotin ustida o`tirgan yetti tog`dir.
10 - oyat - Shu bilan birga yetti podshohdir. Bularning beshtasi mahv bo`ldi, bittasi qoldi, boshqasi esa hali kelgan emas; u kelganda ham ko`p vaqt turmaydi.
11 - oyat - Ilgari bor, hozir yo`q hayvon esa yetti podshohdan biri bo`la turib, sakkizinchisidir, u halokatga yo`liqadi.
12 - oyat - Sen ko`rgan o`nta shox ― o`n podshoh demakdir. Ular hali saltanatni qo`lga olgan emas. Ular hayvon bilan birga podshoh bo`lib, bir soat hokimlik qiladilar.
13 - oyat - Bular bir fikrda bo`lib, qudratni va saltanatni hayvonga topshiradilar.
14 - oyat - Ular Qo`zi bilan jang qiladilar, ammo Qo`zi ularni yengib chiqadi. Chunki Qo`zi hokimlarning Hokimi ― Shohanshohdir. U bilan birga bo`lganlar esa da´vat etilganlar, tanlanganlar, sodiq qolganlardir”.
15 - oyat - Farishta menga yana shunday dedi: “Fohisha o`tirgan, sen ko`rgan suvlar ― elu xalq, millatlar, elatlar va tillardir.
16 - oyat - Sen ko`rgan hayvondagi o`nta shox fohishadan nafratlanadilar. Uni yalang`ochlab, barbod qiladilar, go`shtini burdalab yeydilar, o`zini esa o`tda yondiradilar.
17 - oyat - Chunki Xudo O`zining irodasini bajarishni ularning diliga solgan. Shunday qilib, Xudoning kalomlari bajo kelmagunga qadar, ular bir jon, bir tan bo`lib, o`z hukmronliklarini hayvonga topshiradilar.
18 - oyat - Sen ko`rgan xotin ― yer yuzi podshohlari ustidan hukmronlik qiladigan buyuk shahardir”

Видео Hayvonga mingan xotin . - Yuhannoga Xudo yuborgan Vahiy 17 - bob канала O'zbek Masihiylari