Fakt va Fikr (Maxsus-12): Bilimlaringizni xalqdan qizğanmang! (Obunaçi va muxlislarga murojaat)

Мен кўпчинча шундай гапни эшитиб ёки ўқиб қоламан. “Ахир, ўзбекнинг дарди ва мусибати бир-ку! Шундай бўлса ҳам, нега ўзбек бирлаша олмайди?” Бу риторик саволни сиз ҳам эшитган ёки ўқиган бўлишингиз керак.

Мен бу саволга шундай жавоб бераман.

Миллат бирлашиши учун бир дарднинг ёки бир мусибатнинг ўзи камлик қилади. Дарди ва мусибати бир ўзбекнинг бир мушт бўла олмаётганлиги миллатнинг айби эмас. Бу энг аввало миллат имомларининг, ёзувчи ва шоирларининг, олимларининг, журналистларининг, хуллас, зиёли қатламининг айбидир. Бу қатлам ўзбек халқини бирлаштира оладиган кучли билим, ҳақ ғоя ва харакатлар режасини таклиф қила олмаяпти.

Тасаввур қилинг, бир баракда 35 киши яшайди. Шу 35 кишидан атиги 5 киши уйғоқ. Қолган 30 киши эса сурункали уйқуда. Фараз қилинг, баракдагиларни қул қилишга ёки ўлдиришга ёв бостириб келаяпти. Буни бояги уйғоқ 5 киши билиб турибди холос.

Лекин бу 5 уйғоқ киши ё қўрққанидан, ё эринганидан, ё қандай қилиб уйғотишни билмасликдан ғафлатдаги 30 кишини уйғоштишмайди.

Энди айтингчи, агар ёв бостириб келса-ю 30 нафар ғафлат босганнни ҳам, 5 нафар уйғоқни ҳам қул қилиб олиб кетса ёки ўлдирса, айб кимда бўлади? Ухлаётганлардами ёки уйғоқлардами?

Албатта, айб уйғоқларда бўлади. Чунки улар хавфни кўришган, лекин шу хавфни кўрмаётган баракдошларини уйғоштишмаган. Уйғотишга қўрқишган, эринишган ёки ҳафсала қилишмаган. Ёки ўша уйғоқ 5 кишида ғафлатдагиларни уйғотадиган кучли фикр, ягона ғоя ва уйғонгандан кейин душманга қарши ҳаракатлар режаси бўлмаган.

Эсингиздан чиқарманг, ҳар қандай миллатни ҳақ сўз, ҳақ ғоя ва ҳақ режа бирлаштиради. Ягона ғоя ва ягона режа бўлмас экан, миллат ҳам ягона бўлмайди. Бирлашмайди. Ҳақ сўз, ҳақ ғоя ва ҳақ режани халққа таклиф қилиш эса зиёлиларнинг, яъни уйғоқларнинг ишидир.

Бугун халқ ҳуқуқий ва сиёсий жиҳатдан саводсизми?

Демак, халқнинг зиёлилари ҳам ҳуқуқий ва сиёсий жиҳатдан саводсиздир. Ёки саводли бўлсалар ҳам, ўз билимларини халқдан қизғанадилар. Ёки ўз билимларини халққа етказишдан қўрқадилар. Ёки бу ишни қилишга эринадилар.

Халқ уйғонмаган бўлса, демак, халқнинг ичидаги уйғоқлар, яъни зиёлилар ё қўрқоқ, ё лоқайд, ё ғоясиз одамлардир. Халқнинг уйғонмаганлиги халқнинг эмас, зиёлиларнинг, яъни уйғоқларнинг айбидир.

Мен ўзимни уйғоқ одам деб биламан. Сиз ҳам ўзингизни уйғоқ деб билсангиз керак. Шундай экан, агар миллатимизни уйғотишга жонбозлик кўрсатмасак, мабодо ғафлатдаги миллатимизга бирор кор-ҳол бўлса, бунга миллатимиз эмас, биз гуноҳкор бўламиз. Чунки биз хатарни кўраяпмиз, миллат эса кўрмаяпти.

Шунинг учун билимларингизни халқдан қизғанманг!

Халқимизнинг ҳуқуқий ва сиёсий саводини оширишда танбаллик, лоқайдлик ёки қўрқоқлик қилманг. “Факт ва Фикр” кўрсатувларида айтилган фактларни, фикрларни ва билимларни тарқатганлик Ўзбекистон жиноят кодексида ҳам, маъмурий кодексида жиноят ёки хуқуқбузарлик саналмайди.

Тарихдан сабоқ олайлик!

Агар саҳобалар ва уларнинг издошлари ўз юртлари Арабистондан чиқиб, бизнинг диёрларга келишга, бу ерларда Ислом динини тарқатишга эринганларида ёки қўрққанларида эди, бугун биз маъжусий ёки умуман даҳрий бўлиб юрган бўлишимиз ҳам мумкин эди. Бугун бизнинг мусулмон бўлиб яшаётганимизда ана шу жасур фотиҳларнинг, даъватчиларнинг ва олимларнинг хизматлари беқиёс.

Айтмоқчи бўлганим шу-ки, миллатнинг ҳуқуқий ва сиёсий саводхонлигини оширишнинг савоби ҳам бор.

Фактларни ўрганинг ва фикр қилинг!

Бобомурод Абдулла

2021 йил 23 апрель

Видео Fakt va Fikr (Maxsus-12): Bilimlaringizni xalqdan qizğanmang! (Obunaçi va muxlislarga murojaat) канала Fakt va Fikr