Wolraad Woltemade

Ons skip gaan ten gronde, dit blits en dit donder
Die paniek en die chaos is ‘n ysterhand
Wat klem om my hart, wat my gebede tart,
Ek sien hoe ek sterf in ‘n vreemde land
Is daar ‘n uitkoms, of is dit die einde vir my?

Wolraad Woltemade, jou perd klief deur die water
Jou hande reik uit na my toe
Maar Wolraad Woltemade, ek worstel in die water, ek sink
Jy sien die vrees in my oë

Die lig is ‘n lem wat deur my sny
My asem word rotse binne my
Die las is te swaar, ons trek jou saam
Die half-verdrinktes roep jou naam
Is daar ‘n uitkoms, of is dit die einde vir my?

Wolraad Woltemade, jou perd klief deur die water
Ons hande trek jou ondertoe
En Wolraad Woltemade, jy worstel in die water, jy sink
Ek sien die vrees in jou oë

Die storm is klaar, die golwe bedaar
En stilte hang oor elke hoof
Vir Wolraad en elke man en vrou
Die lewe so gou uitgedoof
Daar was geen uitkoms, dit was die einde vir jou

Wolraad Woltemade, jou perd klief deur die water
En so word jy ons land se held
Maar Wolraad Woltemade, jy tuimel deur die water, jy sink
En daar is lig in jou oë

Видео Wolraad Woltemade канала Emile Minnie