TƏHQİQAT QRUPU DEPUTAT GÜLƏR ƏHMƏDOVA İLƏ GÖRÜŞMƏK İSTƏYİR

Martın 14-də RATİ-nin Media Mərkəzində "Xural" qəzetinin baş redaktoru Əvəz Zeynallının işi ilə bağlı preventiv təhqiqat qrupunun toplantısı olub.

Bildirilib ki, baş redaktor həbsddə olarkən Vergilər Departamenti qəzeti 11 min manat məbləğində cərimə edib. "Cəmi bir ay gündəlik nəşr edilməsinə baxmayaraq Vergilər Departamenti qəzetin 2008-ci ildən gündəlik çap olunduğunu əsas gətirib. Qəzetin 23 qəpiyə satılmasına baxmayaraq 40 qəpik satış qiyməti hesablanıb və 6 000 manat cərimə yazılıb. Vergi öhdəliyini vaxtında yerinə yetirmədiyinə görə isə 5 min manat cərimə kəsilib", - deyə təhqiqat qrupunun üzvü Əfqan Muxtarlı qeyd edib.

Baş redaktor həbsdə olarkən 2012-ci ilin yanvarında Nərimanov rayon məhkəməsi "Bakı-Baltika" MMC-nin işgüzar nüfuza xələl gəldiyinə görə qarşı tərəfdən 150 min manat tələb edən iddiasını qismən təmin edərək qəzeti 50 min manat cərimələyib. Qəzet əməkdaşları bu məhkəməyə dəvət edilməyib. "Bakı-Baltika MMC ilə bağlı məqalələr qurumun işçilərinin şikayətləri və onların təqdim etdikləri videolar əsasında hazırlanıb" -- deyə qəzetin əməkdaşı Nizami Həsənli bildirib.

Təhqiqat qrupu "Bakı-Baltika" MMC haqda yazının tədqiqinin və vergi cərimələri ilə bağlı müstəqil auditor tərəfindən audit aparılması barədə qərar qəbul edib. Qrup görüş üçün deputat Gülər Əhmədovaya da müraciət edəcək.

Xatırladaq ki, "Xural" qəzetinin baş redaktoru Əvəz Zeynallı 2011-ci il oktyabrın 28-də Nəsimi rayon məhkəməsinin qərarı ilə üç ay müddətinə həbs olunub, sonra onun həbs müddəti daha üç ay uzadılıb. Baş Prokuror yanında Korrupsiyaya Qarşı Mübarizə İdarəsi jurnalistə qarşı Cinayət Məcəlləsinin 311.3.3 və 311.3.4-cü (rüşvət tələb etmə) maddələri ilə cinayət işi açıb. Baş redaktor Milli Məclisin deputatı Gülər Əhmədovanın şikayəti əsasında həbs edilib.

Əvəz Zeynallı ona qarşı irəli sürülən ittihamı qəbul etmir və həbsini siyasi sifariş adlandırır.

Видео TƏHQİQAT QRUPU DEPUTAT GÜLƏR ƏHMƏDOVA İLƏ GÖRÜŞMƏK İSTƏYİR канала OBYEKTIV tv