ANA OĞLUNUN FIRILDAQ QURBANI OLDUĞUNU İDDİA EDİR

Oğlu Azad Məmmədovun həbsini əsassız sayan anası Həcər Maqsudi bazar ertəsi RATİ-də mətbuat konfransı keçirib.
Həcər Maqsudi oğlunun 2009-cu ildə dələduzluq ittihamı ilə Bakı Ağır Cinayətlər məhkəməsinin qərarı ilə 10 il müddətinə azadlıqdan məhrum edildiyini deyib.
Məhkəmə qərarına etiraz olaraq A.Məmmədovun saxlandığı 13 saylı həbsxanada artıq 8-ci gündür ki, aclıq aksiyası keçirdiyini xatırladıb. Oğluna qarşı ittihamı, onun həbsini əsassız sayan Həcər Maqsudi bunların əsasında Sahibə Həsənova adlı xırda ticarətlə məşğul olan bir qadının durduğunu göstərib. Belə ki, Sahibə Həsənova Azad Məmmədovun qonşusu Həqiqət Yusubovanı xırda ticarətə qoşur, daha sonra ticarəti genişləndirmək üçün H.Həsənovaya evini girov qoyaraq bankdan pul götürməyi təklif edir. Sumqayıtda "Standartbank"dan buna görə 2007-ci ilin dekabrında 28 min 500 manat pul götürülür. Həqiqət Yusubova bu pulu Sahibə Həsənovaya verir.
Sonra H.Yusubova pulunu tələb etsə də S.Həsənova onu qaytarmaqdan imtina edir. Bu, tərəflər arasında münaqişə yaradır. H.Yusubova pulunu qaytarmaq üçün qonşusu Azad Məmmədova müraciət edir. A.Məmmədov bu işə qarışanda S.Həsənova Masazırda özünə məxsus torpağı sataraq pulu qaytarmağın mümkünlüyünü deyir. Ananın sözlərinə görə, araşdırma zamanı oğlu müəyyən edir ki, göstərilən torpaq S.Həsənovaya məxsus deyil və bu işdən geri çəkilir. Həcər Maqsudi bundan sonra Sahibə Həsənovanın oğluna qarşı şər-böhtan başladığını iddia edir. Belə ki, xırda ticarəti üçün ayrı-ayrı adamlardan pul alan S.Həsənova hamıya Azad Məmmədovu göstərərək pulu onun üçün aldığını deyir. Aldatdığı bir qrup adamla Prezident Administrasiyası qarşısında Azad Məmmədova qarşı aksiya keçirir. Cinayət işi açılır, 2009-cu ildə A.Məmmədov həbsə alınır. Amma istintaq A.Məmmədovun cinayət işində kimlərdən pul alması barədə maddi sübut olmur.
H.Maqsudi oğluna yalnız şahid ifadələri əsasında vətəndaşlara 200 min dollar həcmində vurduğu maddi ziyanı ödəməklə yanaşı 10 il həbs cəzası çıxarıldığını deyir. Ananın sözlərinə görə, məhkəmə prosesində şahidlər öncə pullarını S.Həsənovaya verdiklərini desələr də, sonrakı proseslərdə pulu oğluna verdiklərini iddia ediblər. Həbslə bağlı yuxarı istansiyalara şikayət etsələr də Apellyasiya məhkəməsi və Ali Məhkəmə Bakı Ağır Cinayətlər məhkəməsinin qərarını qüvvədə saxlayıb.

Видео ANA OĞLUNUN FIRILDAQ QURBANI OLDUĞUNU İDDİA EDİR канала OBYEKTIV tv