"STEM-2023" Ақтау | NCOC

Солтүстік Каспий жобасының Операторы NCOC компаниясы 1998 жылдан бері Атырау және Маңғыстау облыстарында 1473 демеушілік және қайырымдылық жобасын жүзеге асырды. Осы жобалардың әрқайсысы білім беру, денсаулық сақтау, мәдениет және спорт салаларын жақсартуға бағытталған. Атап айтсақ, NCOC бірнеше мектепке қажетті оқу жабдықтарын, соның ішінде заманауи STEM-зертханаларын сыйлады. Осы білім беру бағдарламасының төрт негізгі бағыты бар: инженерлік іс, бағдарламалау, робототехника және 3D-үлгілеу.

Солтүстік Каспийдегі теңіз операциялары басталғанының 30 жылдығы аясында компания Маңғыстау облысының Білім басқармасымен бірге облыстың мектеп оқушылары арасында «STEM 2023» ашық чемпионатын ұйымдастырды. Сайысқа жалпы орта білім беру мектептерінің 6-11 сынып оқушылары қатысты. NCOC компаниясы демеушілік және қайырымдылық бағдарламасы аясында Маңғыстау облысының 8 мектебіне (Ақтау қаласында төрт және Түпқараған ауданында төрт мектеп) STEM-кабинеттер сыйға тартқанын атап өткен жөн.

Сайыс келесі санаттар бойынша өтті:
• «Робошайқас» - қатысушылар құрастырған роботтардың рингтегі жарысы;
• «Жобалар» сайысы - қатысушылар көмекші робот жасаулары керек;
• «Қыш құмыра» - қатысушылар саздан ерекше бір бұйым жасаулары керек;
• «Көрме» сайысы - қатысушылар лазерлік білдектерде ағаштан жасалған түрлі бұйымдарды көрсетеді; және
• «Arduino» сайысы - сайысқа қатысушылар «Ақылды үй» тақырыбымен байланысты тапсырмалар орындайды.

Оқушылардың жұмысында тек орындау шеберлігі, өздері жасап шығарған конструкциялар мен бұйымдардың пайдалануға жарамдылығы және дизайн ғана емес, сонымен бірге оқушылардың өз жобаларын қорғау қабілеті бағаланды. NCOC компаниясының мемлекеттік органдармен қарым-қатынас жөніндегі менеджері Олжас Кемелов өз сөзінде: «Жобаның мақсаты – балалардың жаратылыстану және техника ғылымдарына қызығушылықтарын арттыру, оларға ғылыми-техникалық танымдарын өмірде қолдануға көмектесу, сыни ойлау машықтарын дамыту болды. Болашақта бұндай машықтар жаңа идеялар әзірлеуге көмектесетініне, біліктіліктің анағұрлым жоғары деңгейіне жетуге ықпал ететініне сенімдіміз», - деп атап өтті.

Айта кетерлік жайт, чемпионат 2017 жылы Солтүстік Каспий жобасының әлеуметтік және инфрақұрылымдық жобалар шеңберінде салынған Достық үйі ғимаратында өтті.

#NCOC #30yearsNCOC #30yearsKashagan

Видео "STEM-2023" Ақтау | NCOC канала NCOC North Caspian Operating Company