Өскемендік экологтар Ертіс өзенінің суы ластанып барады деп дабыл қағып жатыр

Өскемендік экологтар Ертіс өзенінің суы ластанып барады деп дабыл қағып жатыр. Табиғат қорғаушылар өзен үстіндегі жөнделіп жатқан көпірге қажетті құрылыс материалдарын шашып тастаған компания өкілдерін кінәлайды. Мердігер компания межелі уақытта бітірмеген соң, тапсырыс берушілер сот арқылы келісімшартты бұзған. Көп жылдан бері мәселесі жырға айналған көпір дауын Жанболат Санияз тыңдап келген еді.
Бұл көпірдің ұзындығы небәрі 322 метр. Өткен ғасырдың жетпісінші жылдары салынған өткелге 2014 жылы жөндеу жұмыстары басталған болатын. Бастапқы келісімшарт бойынша қырық айдың ішінде аяқталуы тиіс еді. Бірақ әлі күнге дейін аяқталмады. Енді экологтар шашылған құрылыс материалдары Қара Ертіске қауіп төндіріп тұр дейді.
ЕЛЕНА БЕРЕЗИНСКАЯ, ШҚО Экологиялық бастамалар қауымдастығы филиалының жетекшісі:
– Бұл экологиялық апат. Құрылыс жүріп жатқан кезде де бүкіл қалдықты суға тастады. Қазір де жиналмаған қалдықтар көп. Көктемде су көтерілгенде осы темір-терсек пен бетон қалдықтары төменірек орналасқан қалалық жағажайға барады. Одан ары қарай Шүлбі гидро электро станциясы мен Павлодар қаласына қарай ағады.
Ал облыстық экология департаментінің мамандары құрылыс компаниясына өзен жағасын ластағаны үшін былтыр 716 мың теңге айыппұл салған. Қазір қауіп жоқ. Алаңдау негізсіз екенін айтты.
ҚАНЫБЕК НҰРҒАЛИЕВ, Облыстық экология департаментінің бас маманы:
– Олардың қоршаған ортаға ешқандай зияны жоқ. Көктемде су тасыған кезде ондай қауіп төніп тұрған жоқ.
Аяқталмаған көпірде қазір ешбір жұмысшы жоқ. Мердігер компания межелі уақытта бітірмеген соң, тапсырыс берушілер сот арқылы келісімшартты бұзған. Енді басқа құрылысшыларды іздеп жатыр.
ӘЛІБЕК ТҰРСЫМБЕТОВ, Өскемен қаласы әкімінің кеңесшісі:
– Қазіргі кезде сот шешімімен алты жүз миллион теңге қайтарылды. Сол ақшаға келесі жылы толықтай жөндеу жұмыстары аяқталады.
Осылайша, талай жыл жыр болған бір көпірге кеткен қаражат та әртүрлі айтылады. Облыс әкімі Даниал Ахметов Нұр-Сұлтанда өткізген баспасөз мәслихатында алты миллиард теңгеден астам деген. Ал Өскемен қалалық әкімдігінің қызметкерлері он миллиард теңгеден астам ақша жұмсалды дейді.
Жанболат Санияз
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Өскемендік экологтар Ертіс өзенінің суы ластанып барады деп дабыл қағып жатыр канала Информбюро 31