Дау туғызған Никоновтың пікірінен соң, «Намыстық» белсенділер Петропавл атауын өзгертуді талап етті

Қазақстанның сыртқы істер министрі Мұхтар Тілеуберді «Солтүстік Қазақстан» орыстың сыйға тартқан жері деген Ресей мемлекеттік думасының депутаты Вячеслав Никоновтың пікіріне жауап берді. Министр қазақтың жеріне көзалартып қарап отырған көрші ел саясаткерлерінің сөзін сандыраққа теңеді. Ал осы әңгіме шыққаннан соң, «Намыс» қозғалысының мүшелері Петропавлдың атын ауыстыруды талап етіп, 500 қол жинап, жергілікті билік өкілдеріне петиция табыстады.
Парламент қабырғасына сирек келетін Сыртқы істер министрінен депутаттар «Солтүстік Қазақстан Ресейдің Қазақстанға сыйы» деген Ресей саясаткерлерінің мәлімдемесіне қатысты атқарылған жұмыстар туралы айтуды сұраған. Депутат Омархан Өксікбаев Ресейдегі әріптестерінің сөзі Қазақстанның егемендігі мен шекарасының тұтастығына нұқсан келтіріп жатқанына наразылық танытты. Министр Мұхтар Тілеуберді Сыртқы істер министрлігі Ресей елшілігіне наразылық нотасын жібергеннен кейін көрші мемлекет елшілігі Парламенті мен Президент әкімшілігіне ондай сөздерді жариялауға болмайтынын жеткізгенін айтты. Оның сөзінше, қазақтың жеріне қатысты мәлімдемелер тарихшылар мен ғалымдардың пікіріне сүйенбей айтылған.
МҰХТАР ТІЛЕУБЕРДІ, ҚР Сыртқы істер министрі:
– Ал мына Федоровтың айтқан сөздерінде ең біріншіден өзім қазақ ретінде, Қазақстан азаматы ретінде бұндай сөздерге намысым келеді. Жоғары білім алғаннан кейін, Отанымыздың тарихын білгеннен кейін мен бұған орыс сөздерімен жауап айтар едім. Это бред сивой кобылы.
Бұл сөздерге министрдің ғана намысы оянбағаны анық. Мәселен, алматылық белсенділер Федоров пен Никонов сияқты Ресей саясаткерлерінің мәлімдемесінен кейін петиция дайындап, оны Солтүстік Қазақстан облысының әкімдіне тапсырған. Намыс қозғалысының мүшелері 500 адамның қолын жинап, Петропавлдың атын Қызылжар деп өзгертуді талап еткен.
АЗАМАТ ЖОЛДАНБАЕВ, «Намыс» қозғалысының жетекшісі
– Осындай істерден кейін дұрыс шешім қабылдамасаңыз бұл сіздерге үлкен сын. Тәуелсіздік алғалы 30 жыл өтті. Отыз жылдан бері осы қалалардың атауларын қазақиландыруға бір адамның табылмағаны ма? Осыны бірге атқарайық.
Жергілікті билік өкілдері бұл бір күнде шешіле салатын жұмыс емес деп, бірақ талаптарды қарастыратынын мәлімдеді.
КЕМЕЛ ОСПАНОВ, СҚО ішкі саясат басқармасының басшысы:
– Мен қазір бұны әкімге табыс етемін. Біз осыны қарап, өздеріңізге арнайы жауап береміз.
Белсенділер бұл жерлер Ресейдің Қазақстанға емес, Құдайдың қазаққа берген сыйы дейді. Олар Петропавлды Қызылжар, Павлодарды Ертіс деп атауымыз керек деген пікірде. Ал министр Мұхтар Тілеубердінің сөзінше, Қазақстан шекарасы делимитациядан өтіп, шекара мәселесі түбегейлі шешілген. Ал демаркация жұмыстары алдағы екі - үш жылда аяқталуы тиіс екен.
Руслан Жасұланұлы, Қуаныш Әлтенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#намыс #қазақстан

Видео Дау туғызған Никоновтың пікірінен соң, «Намыстық» белсенділер Петропавл атауын өзгертуді талап етті канала Информбюро 31