Қуаңшылықтан жапа шеккен маңғыстаулық шаруалардың жағдайын көруге министр келді

Ауыл шаруашылығы министрінің өзі Маңғыстау облысындағы мал шаруашылығының жағдайын қиын деп бағалап отыр. Шаруалар былтыр ала жаздай даладан азық таппаған малымыз биылғы көктемнен де аман шықпай қала ма деп қорқады. Сондықтан қуаңшылықтың алдын алу үшін министрге бірнеше ұсыныс дайындап қойыпты. Ал Ербол Қарашөкеев өңірдегі жағдайды жеке бақылауына алғанын және жол картасы бойынша жұмыс істеліп жатқанын айтады.
Амалдары таусылған маңғыстаулық шаруалар Нұр-Сұлтанға екі-үш рет, әкімдікке бірнеше рет барғаннан соң ғана жарты жыл дегенде министрдің өзі келді. Күрделенген қуаңшылық мәселесі ауыл шаруашылығы министрін жолсыз жолмен жүргізіп, мал қораға да кіргізді. Ербол Қарашөкеевке шаруалар мал асыру мәселесінің жандарына батқан жақтарын көрсетті. Азаматтар төрт түліктің 70 пайызы өліп, қалғаны көтерем болып тұрған шақта шенеуніктердің енді-енді іске кірісіп жатқанына ренжіді.
ӘДІЛБЕК САҒЫНДЫҚ, шаруа:
– Егер халықта мал жоқ болса сіз министрдің керегі жоқ онда ауыл шаруашылық, не істейміз? Мына жердің бәрі тозып бітті.
Күйсіз малды аман алып қалу үшін шырылдап жүрген азаматтардың ұсыныстары да дайын екен. Осы бастан қаражат бөліп, көктемнің басында және жаздың соңында арнайы құрылғының көмегімен жаңбыр жаудырса дейді. Егер одан нәтиже болмаса уақытша мал бағуға көрші өңірлерден жер алып, жағдай жасауын сұрады. Ал министр Маңғыстау облысындағы мәселені жеке бақылауына алып, шаруалармен тікелей байланысып отырғанын және жол картасы бойынша әрекет етіп жатқанын айтты.
ЕРБОЛ ҚАРАШӨКЕЕВ, ҚР Ауыл шаруашылығы министрі:
– Мына шаруаны шешу керек, мынау проблема мәселе өсіп кеткен жылқының басын бір жаққа шығарып, дұрыстап, ғылыми негіздеме бойынша біз шешу керекпіз. Қанша жылқы мына Маңғыстау өңірінде осы жағдайда болатын болса күрт өзгеретін болса жайылымдардың жағдайлары. Сол себепті сол жағынан жол картамен барлығын бағалап отырмыз.
Министрдің сөзінше былтыр игерілмей қалған 650 миллион теңгеге жуық қаражат үкіметтен қайта бөлінген. Ол қаражат мал азығын арзан бағаға алу үшін әр бас малға беріледі деді шенеунік. Одан бөлек, облысқа қосымша 17 ветеринар жіберілетін болды. Және төрт түлікті бірдейлендіру базасына тіркеу үшін малға қойылатын чип бағасын шамамен екі есеге арзандатпақ. Ал шаруалардың айтқан өтінішін үкіметте міндетті түрде қарастырамыз дейді министр Қарашөкеев.
Махаббат Нұржанқызы, Фархад Шадкам
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Маңғыстау #қуаңшылық #министр

Видео Қуаңшылықтан жапа шеккен маңғыстаулық шаруалардың жағдайын көруге министр келді канала Информбюро 31