Сал ауруына шалдыққан балалар мектеп-интернаты көшіріледі деген хабар дүйім жұртты дүрліктірді

Түркістан облысы Тасарық ауылындағы арнаулы әлеуметтік қызметтер көрсету орталығын көшіруге қарсылық білдірген ата-аналар мен педагогтар бүгін шу шығарды. Сөздерінше, Төле би ауданындағы мектеп интернатты шалғай жатқан Кентауға көшірмек. Ал бұл орталықта туа бітті сал ауруына шалдыққан балалар ем қабылдайды. Оқу-сауықтыру орталығының басшылығы ұжым мен ата-аналарға осындай жайсыз хабарды жеткізген соң, педагогтардың алды басқа жұмысқа ауыса бастапты.
Бауыр еті балалары үшін алаңдаған ата-аналар осылай шырылдап, бүгін біраз жауаптыларды сұрақтың астына алды. Айтуларынша, 10 күннен бері мекеме басшылығының мектеп-интернатты Кентауға көшіреді деген бір ауыз сөзі ұжым мен ата-аналарды дүрліктіріп жіберген. Туа бітті сал ауруына шалдыққан 64 баланы шалғай өлкеге ығыстырып, керісінше ондағы туберкулезге қарсы диспансер науқастарын осында көшіру жоспары барын айтады ата-аналар.
АЙГҮЛ САТЫБАЛДИЕВА, Ата-ана:
– Балалар одан туберкулезный орынға баратын болса, өздері жарымжан балалар, одан гөрі бір-бір укол салып, өлтіріп тастай салсын онда, шындап айтқанда.
Аталған орталықта еліміздің түкпір-түкпірінен ауыр дертке шалдыққан балалар бар. Бірақ дені осы өңірден. Интернаттағы 9 тәрбиеленуші тұл жетім. Сал ауруымен ауыратын балалардың әрқайсысына үнемі жеке дара ден қою керек деген педагогтар олардың өзге орынға сіңісіп кетуі өте қиын деп уайымдайды. Ал интернат жуырда жабылса, ақыры қысқартылуға ұшырайтынын білген кейбір мұғалімдер өзге жұмыс іздеп кетіпті.
ДИНАРА ЖАНДАРОВА, мұғалім:
– Біраз мұғалімдер уже кетті басқа жаққа. Орнығып кетті. Себебі жұмыссыз ешкім қалмауы керек қой. Қазіргі таңда барлық отбасында кредит бар. Дұрыс па? Ол кредит, банк бізді күтпейді.
Ал аудан басшылығы әу баста орталықтың орнын ауыстыруға мұндағы бала санының азайып кетуі себеп дейді. Науқас бүлдіршіндердің күтуші ақысы мен жәрдемақысын қосқанда 114 мың теңгені алуы үшін ата-аналар балаларын интернаттан шығарып алған деп отыр. Бірақ көпшіліктің көшіруге қарсы пікірін айтып, облыс басшылығына да хат жазыпты. Алайда, нүктесі қойылмапты.
СЕРЖАН ДҮЙСЕБАЕВ, Төлеби ауданы әкімінің орынбасары:
– Ол енді қазір нақты шешілген жоқ. Кезінде туберкулезный деп айтылған. Ол мекеме бұл жерге келмейді, ондай хабар жоқ. Ешқандай қаулы шыққан жоқ. Қандай мекеме келетінін де білмейміз.
Қалай болғанда да, туа бітті тағдыр тауқыметін тартып жатқан балалары үшін алаңдайтын ата-аналар орталықты орнында қалдырудың қамын жасаймыз дейді. Олар тіпті, науқас бүлдіршіндерін құшақтап, Президентке барудан да тайынбаймыз деп отыр.
Мақсат Жақсыбайұлы
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Сал ауруына шалдыққан балалар мектеп-интернаты көшіріледі деген хабар дүйім жұртты дүрліктірді канала Информбюро 31