Президент ретке келтіруді талап еткен «Алтын Орда» базарында өзгеріс бар ма?

Президент тапсырма берсе де Алтын Орда базарында әлі тәртіп орнаған жоқ. Кейбір кәсіпкерлер, базар басшылығы айтқан тауарды ғана сатуға мәжбүр екенін айтады. Ал делдалдар азық-түлік құнын шаруа қожалықтары төмендетпейінше, бағаны түсіре алмаймыз деп отыр. Мемлекет басшысының делдалдыққа тоқтау салып, заң аясында реттеу керек деген тапсырмасына Алматы облысының әкімдігі жақын күндері комиссия барғаннан кейін кірісеміз деп отыр.
Азық-түлік арзандау деп "Алтын Ордаға" қарай ағылған жұртпен бірге біз де базардағы бағаны бағамдап көрдік. Алдымен ет павильонындағы көпшілік көп тұтынатын сиыр етінің құнын білдік. Қазір 120 теңгеге түсті деген саудагерлер, келісін 2 мың160 теңгеден алып, оны 2 жарым мың теңгеден сатып жатырмыз деді. Бағаны бұдан ары төмендете алмаудың басқа да себептері бар екен.
САҚЫПЖАМАЛ ӘШІМОВА, кәсіпкер:
– Бұрын өзіміздің оптовиктер болатын өзіміздің балалар. Солар алып келсе біз скидка алатынбыз, өкпе-бауырын алатынбыз, соның өзі бізге көпкөрім көмек болатын. Қазір ондай мүмкіншілік жоқ. Тек осы бастықтардың ғана етін сатамыз ғой.
Ал көтерме бағамен көкөніс сататын делдалдар, шаруа қожалықтары қойған бағаға 5-10 теңге ғана қосамыз дейді. Қазір қаптап алатындарға пиязды 70, картопты 180, сәбізді 140, қырыққабатты 240 теңгеден беріп жатыр.
Дәл осы делдалдардан өнім алған кәсіпкерлер базардағы павильонның ішінде келілеп сатады. Картоп пен сәбіз 250, пияз 160, қырыққабаттың келісі 350 теңге.
Делдалдардың айтқан бағасы рас болса, саудагерлер үстінен 50 теңге қойдық деген баға қайтсек те шықпайды. Мәселен, пиязға 90, картопқа 60, сәбіз бен қырыққабатқа 110 теңге қосылып тұр. Бұл сапасы едәуір жақсы деген өнімдердің құны. Базар әкімшісі бағаға мүлдем араласпаймыз, тек жерді жалға берумен айналысамыз деп отыр.
ЖҰМАДИН ПАТОВ, "ALTYN ORDA KAZTRADE" ЖШС директорының орынбасары:
– Саудагерлер бағаны өздері келіседі. Кәсіпкерлердің барлығы тіркелген. Бірақ неге түбіртек бермейтінін білмеймін, адамдар да сұрамайды ғой.
Мемлекеттік кірістер комитеті, 40 гектарға ие әйгілі "Алтын Орда" базарынан былтыр бюджетке 34 миллион теңге салық түсіпті. Қазір базарды жаңарту жұмыстары жалғасып жатыр, оған бас-аяғы 5 жыл уақыт кетеді екен.
Әйгерім Ердәулет, Геннадий Лукин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#АлтынОрда #базар #өзгерістер #баға

Видео Президент ретке келтіруді талап еткен «Алтын Орда» базарында өзгеріс бар ма? канала Информбюро 31