Кімдердің кредиті кешірілетін болды?

Банкрот деп танылған азаматтар мемлекеттік қызметке орналаса алмауы мүмкін. Сондай-ақ, жеке компания яғни, жауапкершілігі шектеулі серіктестік те құра алмайды. Қаржы министрлігінің мамандары қазір жеке тұлғалардың банкроттығы туралы заң жобасына осындай талаптарды талқылап жатыр. Қаржы вице-министрі Марат Сұлтанғазиев 5 миллион теңгеге дейінгі қарызы бар азаматтар сотсыз банкроттық жариялай алатынын айтты. Ал, берешегі 5 миллионнан асқан азаматтардың банкроттығын тек сот шешеді
Қазақстанда 1 миллионнан астам адам несиесін төлей алмай отыр. Біреуі жұмысынан айырылған, енді бірінің табысы тоқтаған. Ол азаматтар өзін банкрот деп жариялау үшін әуелі расында кірісінің жоқ екенін дәлелдеуі тиіс. Оны жауаптылар ең төменгі күнкөріс деңгейімен анықтаймыз деп отыр. Яғни: ол азаматтың ай сайынғы табысы 36018 теңгеден аспауы керек. 306 300 теңгеден аспайтын берешегін бір жыл бойы төлей алмай жүрген азаматтар мен 5 миллионға дейінгі несиесін алты ай бойы төлей алмаған азаматтардың қарызы сотсыз кешіріледі. Алайда, ол азаматтың атында ешбір мүлік болмауы шарт. Ал, берешегі 5 миллионнан асатын борышкерлер сотқа жүгінеді. Мүлкі болса, аукцион арқылы сатылып, қаржы несиені жабуға жұмсалады. Ал, атында жалғыз баспанасы болса оны банк тартып ала алмайды. Алайда, үйі банктің кепілдігінде болмауы керек. Ал, кепілдікте тұрған баспана болса қарызының 85 пайызы төленген жағдайда ғана өзінде қалады. Яғни, ипотекаға пәтер алып, несиесінің басым бөлігін төлеген азаматтардың үйін банк алып қоймайды. Алайда, оны тек сот шешеді. Сондай-ақ, мынандай шектеулер бар:
МАРАТ СҰЛТАНҒАЗИЕВ, ҚР Қаржы бірінші вице-министрі:
– Егер бір рет адам банкрот болса екінші рет тек жеті жылдан кейін ғана мүмкіншілігі бар. Бірақ сол үшін мынау шектеулер қойылады: шетелге шығарылмайды, кейін анау екінші рет несие ала алмайды.
Алайда, банкрот болған азамат жұмыс істеуге, емделуге немесе науқасты емге апару үшін шетелге шыға алады. Бірақ, демалу үшін шетел аса алмайды. Банкроттыққа өтініш электронды үкімет порталында қабылданады. Қазір мамандар онлайн платформаны ойластырып жатыр. Енді қабылданатын заңға қатысты мәжіліс депутаттары да бірнеше ұсыныс айтты:
АЙДОС САРЫМ, ҚР Парламенті Мәжілісінің депутаты:
– Анау "Ақшомат", бірдеңе дейтін дүниелер бар ғой. Оңды-солды, куәлігіңді салдың... Саған сыртылдатып адам шошитын процентке ақша беретін. Меніңше сондайларды жабу керек
АЙБЕК ПАЯЕВ, ҚР Парламенті Мәжілісінің депутаты:
– Кредит алудың жолдары да әділ түрде қаралу керек болатын болады. Өзіңіз білесіз ғой қазір кредит алып алып, төлемей жатқан мәселені де көп көреміз, білесіз. Сол себептен біріншіден кредит алатын азаматтар да, одан кейін банктер де егжей-тегжейлі талдап, дұрыс шешім қабылдап беретін болады кредитті.
Айта кетейік, жеке тұлғалардың банкроттығы туралы 2010 жылдан бері айтылып келеді. Былтыр жүздеген адам несиесін кешуріге рақымшылық сұрап, наразылыққа шыққан болатын. Алайда, жауаптылар тек қасіретті қаңтар оқиғасынан кейін Президент тапсырма бергеннен соң ғана заң жобасын дайындады. Айтылған талаптар әлі де талқыланады. Шенеуніктер заң депутаттардың қарауына келесі айда жіберіледі деп отыр.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#кредит #банкрот #жеке_тұлғалар

Видео Кімдердің кредиті кешірілетін болды? канала Информбюро 31