Kahit Wala Na Tayo (Spoken Word Poetry)

Kahit Wala Na Tayo

Naranasan ko nang bumitaw sa taong hindi ko pa nahahawakan
Naranasan ko nang kumalas sa taong hindi ko pa nahahagkan
Nasanasan ko nang sumugal na ang sandata lang ay pagmamahal
Kaya't nang minsan akong matalo, ay nakita ko
Na hindi pala sapat ang pag-ibig lang,
Sapagkat kailangan mo rin ng tiwala
Dahil sa bawat araw na hindi mo siya kasama
Ay pahihirapan ka ng utak mong natatakot sa distansiya

Idadamay niya ang puso,
Babalutin ito ng kaba
Ng pagdududa
Hanggang sa dahan-dahan ay mawalan ka ng kumpiyansa
Kung kakayanin pa ba
Na ipagpatuloy ang nasimulan
Kahit hinahadlangan ito ng espasyo sa pagitan

Natagpuan kita kahit nasa magkabilang dako tayo ng mundo
Nahanap kita kahit pagtatago ang ginugusto mo
Hindi mo kailangan ng iba
Sanay ka sa pag-iisa
Pero hinayaan mo akong samahan ka
Sapagkat nalaman mong hindi ako katulad mo
Kailangan ko ng iba
Takot ako sa pag-iisa

Kaya't nanatili ka. Sinamahan mo 'kong tumaya.
Kahit 'di ka sigurado kung mananalo tayo sa dulo.
Kung hanggang saan nga ba ang tayo.
Kung saan nga ba 'to patungo
Sapagkat hindi tayo umuusad
Dalawa tayong nakakulong sa kaniya-kaniya nating lungga
Hindi makalaya, hindi natin magawang magkita
At dito ko napatunayan na hindi palaging masaya
Na mahirap pala talaga ang pagsugal nang walang baon na aral
Na ang tanging pinanghahawakan lamang ay ang pagmamahal
Parehas tayong naging handa, parehas tayong naging matapang
Pero parehas din tayong nagpadalos-dalos nang kaunti lamang ang alam

Ang pagluha mo, ay ang aking pagkabaliw
Tinatanong ang sarili kung paano kita mapapakalma
Kung ang tanging paraan na alam ko lang ay 'yung mayakap ka
Pero hindi ko 'yun magawa
Sapagkat nariyan ka, at nandito lang ako
Boses ko lang ang maihahandog para sa paghilom mo
At alam kong hindi 'yun sapat
Parang kulang na kulang ang lahat.

Pero kahit ganito, ay pinili mong mahalin ako.
Kinaya mong magtiis. Kinaya mong lumaban.
Kahit maubos ay paulit-ulit kang susugal
At dito tayo nagkaiba.
Hindi ko pala kaya na dito ay sabayan ka.
Gusto kong magtira.
Takot akong magmahal ng taong sobra akong mahal.
Dahil baka 'di ko kayang matapatan.
Di ko kayang masuklian.
At ayokong sa dulo ay lubusan lang kitang masaktan
Kaya bago tayo tuluyang magwakas
Ay pinili kong magsimula na lang ulit
Bibitaw ako hindi para kumalas
Kung 'di para muling kumapit
Sapagkat nakita ko kung gaano kahirap umibig
Sa taong hindi mo naman katabi
pero lagi mong nasa isip

Kaya, hayaan mo 'kong tapusin muna ang tayo
Para kilalanin kang muli
Hayaan mong magpahinga ang puso
Para lumaban siyang muli
Habang may distansiya
Ay mananatili tayong magkaibigan na lang muna
Nang sa ating pagkikita ay mas maging matibay tayong dalawa

Babalikan kita.
At gusto kong malaman mo
na kahit wala na tayo,
ay mahal na mahal pa rin kita.

#KahitWalaNaTayo #SpokenWordPoetryPh
-
For more updates, follow me on my social media sites listed below:

FACEBOOK PAGE: https://www.facebook.com/bcumla
TWITTER: https://twitter.com/Beverly_Cumla
INSTAGRAM: @beverlycumla

JOIN OUR FACEBOOK GROUP AND BE PART OF THE BEVIES:
https://www.facebook.com/groups/11935...

For business purposes, email me at:
beverly.cumla@gmail.com -
-
#BeverlyCumla #SpokenWord #Poetry #HugotTalk

Видео Kahit Wala Na Tayo (Spoken Word Poetry) канала beverly cumla