Kung Pwede Lang Sana | Spoken Word Poetry by Beverly Cumla

Kung Pwede Lang Sana
ni Beverly Cumla

Anong oras na,
Hindi ko pa rin magawang tawagan ka
Kaya ko naman sana.
Kaya kong hawakan ang telepono
at pindutin ang mga numero
Kaya ko naman sanang unahan ka.
Pero mas kaya kong maghintay.
Sapagkat dito mo ako sinanay.
Kaya, hindi na lang.
Hindi na lang ako tatawag sa'yo.
Dahil mas masakit sa'kin kung ibababa mo lang ito.
Pipiliin ko na lang ang manatili hanggang sa pagdating mo
Tanggap ko naman kasing takbuhan mo lang ako.

Pupuntahan, kapag kailangan.
Kapag hindi ka na niya kayang alagaan.
Pupuntahan, kapag nasasaktan
Kapag hindi mo na siya kayang maintindihan
Pupuntahan - mo lang - ako.
Sa tuwing nagkakaproblema ang kayo.

Kakatok ka.
At pagbubuksan naman kita.
Sapagkat pagdating sa'yo ay hindi kailanman naging sarado ang pinto.
Handa, ang aking mga braso sa iyong pagyapos
Habang ang luha mo ay patuloy na umaagos

At ang hapdi rin pala talaga ng mga patak nito
Nasasaktan ako sa 'yong hinagpis
Nagagalit, naiinis
Dahil nagagawa ka niyang paluhain ng paulit-ulit
Pero mas nasasaktan ako sa iyong hinagpis
mas nagagalit, mas naiinis hindi dahil sa kaniya
kung di dahil sa sarili kong mga nais
Sapagkat kahit masakit sakin ang makita kang umiiyak ng parang walang katapusan
ay hinihiling ko na sana ay lagi ka na lang niyang saktan
para lagi mo rin akong puntahan
Hanggang sa mapagod ka na sa piling niya
at piliin mo na sa piling ko na lang magpahinga

Kung pwede lang sanang agawin na kita sa kaniya
Kung pwede lang sanang hindi na kita pakawalan pa
Kung pwede lang sanang sabihin sa'yo na 'wag nang lumisan pa
Na akin ka na lang
Na sana ako na lang
Pero hindi.
Dahil nakikita ko na kahit siya ang nagpapaluha sa'yo
Ay siya rin mismo ang kasiyahan mo.
Napapatahan lang kita.
Pero hindi kita napapatawa.
At sapat na dahilan na 'yun para hayaan kita sa kaniya.

Kaya kahit gusto kitang angkinin
Ay hindi ko magawa.
Dahil kahit higpitan ko pa ang kapit
Ay alam kong pipiiin mo pa ring kumalas
iIang beses ka man niyang bigyan ng wakas
Sa kaniya ka pa rin babalik
Bibisita ka lang sa akin
pagkatapos ay aalis rin.

At maiiwan ulit ako.
Muling maghihintay sa'yo.

Pero 'wag kang mag-alala.
Hangga't kaya ay hindi ako mawawala.
Ayos na sa'kin ang mahagkan lamang kita.
at hindi na 'ko hihiling ng higit pa.
Sapat na ang mahal kita.
Kahit 'di mo na 'ko mahalin pa. -
-
#BeverlyCumla #SpokenWord #Poetry #HugotTalk

Видео Kung Pwede Lang Sana | Spoken Word Poetry by Beverly Cumla канала beverly cumla