ŞƏMKİR SAKİNLƏRİ MELİORASİYA İDARƏSİNDƏN ŞİKAYƏTÇİDİR

Şəmkir rayonunun Seyfəli və Nərimanlı kənd sakinləri aldadılmaları
ilə bağlı RATİ-də mətbuat konfransı keçiriblər.
Aldadılmış vətəndaşların vəkili, "Peşəkar Hüquqşünaslar" İctimai
Birliyinin sədri Tağı Hüseynov məsələnin mahiyyətinə aydınlıq gətirib.
2009-cu ildə "Meliorasiya və Su təsərrüfatı" ASC-in Tikilməkdə olan
Meliorasiya və İrriqasiya Obyektlərinin Birləşmiş Müdriyyəti bu
kəndlərin bir qrup sakininin torpağını dövlət ehtiyacları adı ilə
vətəndaşlardan alıb. Sakinlərə burada "Şəmkir su anbarı"nın"
tikiləcəyini söyləyiblər. Sakinlərin sözlərinə görə, söhbət bu adla
alınan 200 ha torpaqdan gedir. Vəkil burada torpağın alınması sözünün
belə yerinə düşmədiyini deyib.
Adi çəkilən qurumun rəhbəri Ramiz Vəkilovun müavini Rafael
Məmmədov, "Azərdövlətsulayihə" institutunun əməkdaşları Nəbi İsmayılov
və Fazil Hüseynov sakinlərə kompensasiyaların bazar qiymətlərilə
veriləcəyini deyib. Sakinlərə hansısa sənədlərə qol çəkdiriblər. Amma
həmin sənədlərdə veriləcək kompensasiyanın məbləği göstərilməyib.
Yalnız 2010-cu ilin yayında bankdan pullarını alan sakinlər ciddi
şəkildə aldadıldıqlarını başa düşüblər. Belə ki, torpağın hər sotuna
görə sakinlərə 50 manat verilib. Meyvə ağaclarına gəlincə, 5 yaşa
qədər olan meyvə ağaclarına görə 1 manat, 5 yaşdan yuxarı meyvə
ağaclarına görə 5 manat ödənib. Halbuki, sakinlər Şəmkirdə torpağın 1
sotunun 1000-1300 manatdan az olmadığını deyirlər. Bar gətirən hər bir
qoz ağacı sahibinə ildə 450 manatdan çox gəlir verir. Beləcə,
aldadıldıqlarını başa düşən sakinlər haqları uğrunda mübarizəyə
başlayıblar. Vəkil bu məsələdə su təsərrüfatını günahkar sayıb. Çünki,
birlik başçıları vətəndaşın hüququnu bilməməsindən istifadə edərək onu
aldadıb. İnsanın hüququnu bilməməsi, hansısa sənədlərə qol çəkməsi
belə qarşı tərəfi məsuliyyətdən azad etmir.
Hadisə ilə bağlı sakinlər dövlət başçısına müraciət ediblər. Müraciətə
imza atanlar rayon icra hakimiyyətinə qəbula çağırılıblar. Qəbul
zamanı sakinlər şikayətlərinin icra hakimiyyətindən yox, meliorasiya
idarəsindən olduğunu deyiblər. O zaman sakinlərə öncə "icra
hakimiyyətindən şikayətim yoxdur", daha sonra isə "ümumiyyətlə
şikayətim yoxdur" məzmunlu ərizə imzalatdırıblar.
Şəmkir sakinləri isə istər torpağa, istər meyvə ağaclarına görə
verilən kompensasiyadan narazıdırlar. Onlar məsələni həll etmək üçün 1
saylı Bakı İqtisadi-İnzibati məhkəməsinə müraciət ediblər. Məhkəmə
iyunun 20-nə təyin edilib.

Видео ŞƏMKİR SAKİNLƏRİ MELİORASİYA İDARƏSİNDƏN ŞİKAYƏTÇİDİR канала Obyektiv TV