ÖMÜRLÜK MƏHBUSUN QARDAŞI İŞƏ YENİDƏN BAXILMASINI TƏLƏB EDİR

"Ömürlük həbs olunmuş və cəzasını Qobustan həbsxanasında çəkən qardaşım Sahib Məmmədəliyevin işinə yenidən baxılmasını tələb edirəm". Bu sözləri İlham Məmmədəliyev bu gün Reportyorların Azadlıq və Təhlükəsizlik İnstitutunun ofisində keçirdiyi mətbuat konfransında deyib.

O xatırladıb ki, qardaşı Qarabağ müharibəsi zamanı "Qaranquş" dəstəsinin üzvü olub. 6 sentyabr 1993-cü ildə o, 1993-cü ilin avqustunda erməni işğalı zamanı Qubadlı rayonunun rəhbərlərindən beş nəfəri öldürmək ittihamı ilə həbs edilib. Söhbət rayon prokuroru, polis rəisi, sürücü, hakim və müstəntiqin qətlindən gedir.

Məhkəmə bu qətllərə görə bir neçə şəxs barəsində ölüm hökmü çıxarıb. 1998-ci ildə ölüm cəzası ləğv edildiyi zaman Sahib Məmmədəliyevin cəzası ömürlük həbslə əvəz edilib.

2000-ci ildə yeni Cinayət Məcəlləsi qəbul edilib. Burada 70-ci maddə (quldurluq) və 94-cü maddə (qətl) müvafiq olaraq 217 və 120-ci maddələrlə əvəz olunub.

İlham Məmmədəliyevin sözlərinə görə, qardaşı köhnə CM-in 70-ci maddəsi ilə həbs edilib, bu, yeni CM-də artıq 217-ci maddə olub. "217-ci maddədə ömürlük cəza nəzərdə tutulmayıb, ən uzun müddət 15 ildir, Sahib Məmmədəliyev isə artıq 19 ilə yaxındır həbsdədir", deyə qardaşı qeyd edib.

Onun sözlərinə görə, 2001-ci ildə o, apellyasiya şikayəti verib, lakin Apellyasiya Məhkəməsi birinci instansiya məhkəməsinin qərarını qüvvədə saxlayıb. Ali Məhkəmə kassasiya şikayətimizi qəbul etməyib, belə ki, onun verilməsi müddəti keçmişdi.

Xatırladaq ki, Qubadlı rayonunun rəhbərləri əhalini başsız qoyaraq rayonu ermənilərə təslim etmək ittihamı ilə könüllülər dəstəsinin üzvləri tərəfindən qətlə yetirilmişdilər.

Hazırda Qobustan həbsxanasında ömürlük həbsə məhkum edilmiş 81 məhbus cəza çəkir. Bundan əvvəl onların sayı 132 nəfər idi. Bu məsələni dəfələrlə həm məhbuslar özləri, həm də onların doğmaları qaldırıb. Yeni CM-in qəbulu ilə əlaqədar ömürlük məhbusların cəza müddətləri dəyişdirilməli idi. Lakin artıq bir neçə ildir ki, bu məsələ həll olunmur.

Видео ÖMÜRLÜK MƏHBUSUN QARDAŞI İŞƏ YENİDƏN BAXILMASINI TƏLƏB EDİR канала Obyektiv TV