Солтүстікке оңтүстік өңірлерден көшіп келген азаматтар жағдайдың жоқтығына наразы

Солтүстік Қазақстан облысына еліміздің оңтүстік өңірлерінен «Еңбек» бағдарламасымен көшіп келген азаматтар үйлерінде тоңып отыр. Жаңадан салынған баспаналардан қазірдің өзінде сызат шығып, жақтаулары бұзылып жатыр. Соның салдарынан үй суық боп, тұрғындар жаурап жүргендерін айтады. Рақымжан Тоқтанаев мемлекет салып берген жаңа үйдегі олқылықтарды осылайша тізіп берді. Ол отбасымен бірге Шымкенттен көшіп келген. Оның сөзінше, жап-жаңа үйдің еденінен де, төбесінен де суық келіп тұрады. Тіпті, күні-түні тоқтаусыз пеш жағып жан бағып отырса да, баспаналары жылымайды екен. Қар түсіп, күн суытқалы үйде сырт киімдерімен жүретіндерін айтады. РАҚЫМЖАН ТОҚТАНАЕВ, Покровка ауылының тұрғыны: – Мен жеті жарым миллион мына үйге кетті деп есептемеймін. Өзім де құрылысшымын. Мен бәрін көріп біліп отырмын. Мен ито 3 миллионға мынадай есіктер салмаймын. Бұл сапасыз үй. Покровка ауылында оңтүстік өңірден көшіп келгендерге 7 үй салынған. Олардың барлығы да құрылыстың сапасыздығына шағымданады. Тұрғын үй беріп, жұмыспен қамтимыз деген әкімдік қызметкерлерінің сөзіне алдандық дейді олар. Кейбірі орысша білмегендіктен ешқай жерге жұмысқа тұра да алмай жүр. ЖҮСІП ӨМІРЗАҚҰЛЫ, Покровка ауылының тұрғыны:– Мынау 7 миллионға татитын үй емес ешқандай да. Адамның бәрі есеп біледі. Есептесеңіз шықпайды. Жұмыс та жоқ. Ешқандай. Не жұмыс бермеді. Менің дипломым бар, бухгалтер-экономист. Агрономдікі де бар. Осы үйлерді салған құрылысшылардың сөзінше, сапалы, жылы үй салу үшін 7 миллион теңге жетпейді екен. Бірақ бұл жөнінде сұқбат беруден бас тартып, камерадан қашты. Ал осы үйді қабылдап алған жергілікті билік оның сапасына бас қатыра қоймаған сияқты. Өйткені салынған үйлердің ақшасын төлеген кезде ешкім ол үйлердің жағдайын тексермепті. БЕРІК ТЕМІРБЕКОВ, Мамлют ауданы ТҮКШ бөлімінің басшысы:– Біз ол үйлерді салған жоқпыз. Біз ол үйлерді салған күйінде сатып алдық. Құрылыс басталған кезде контракт жасасақ, фундамент бастағаннан бастап шатыр көтергенген дейін тексеріп алар едік. Бірақ та салынған күйінде алдық. Мамандардың сөзінше, мердігерлер бір айдың ішінде барлық олқылықтарды реттеп беруге уәде еткен. Ал жергілікті тұрғындар бұл істе бір шикілік барын айтып, прокуратура органдарының тексеруін талап етеді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Солтүстікке оңтүстік өңірлерден көшіп келген азаматтар жағдайдың жоқтығына наразы канала Информбюро 31