Дариға Назарбаева үлкен саясатқа қайта оралуы мүмкін

Дариға Назарбаева үлкен саясатқа қайта оралуы мүмкін. Сенаттың экс-төрайымы «Нұр Отан» партиясы Мәжіліске ұсынған тізімде 126 үміткердің бірі боп тұр. Сонымен қатар, Қазақстан билігінде салмақты орны бар Асқар Мәмин, Нұрлан Нығматулин, Ерлан Қошанов, Бауыржан Байбек пен Ахметжан Есімов те съезд ұсынған партия тізіміне еніпті. Әзірге бұл азаматтардың қайсысы депутат болатыны, болашақта Мәжіліс төрағасы кім болатыны белгісіз. Ал билік партиясы алдағы 5 жылға арналған бағдарламасын жариялады. Ол үшін, тіпті, бюджеттен қанша қаражат бөлінетінін де есептеп қойыпты. Елде коронавирус, съезд - онлайн. Дөңгелек үстел басында «Нұр Отанның» тек белді мүшелері. Жиынды Нұрсұлтан Назарбаев ашып, партия бағдарламасын Қасым-Жомарт Тоқаев таныстырды. Президент сөзін әлеуметтік саладағы қолдаулар пакетіндегі жаңалықтардан бастады. ҚАСЫМ-ЖОМАРТ ТОҚАЕВ, Қазақстан Республикасының Президенті: – Жеке көмекші қызметін пайдаланбайтын бірінші топтағы мүмкіндігі шектеулі азаматтардың барлығына қосымша әлеуметтік қолдау көрсетіледі. Осыған орай берілетін арнаулы жәрдемақы ең төменгі күн көріс деңгейінің 1,4 есе көбейтілген мөлшеріне тең болады. 2025 жылға қарай мүмкіндігі шектеулі азаматтарды жұмыспен қамту көрсеткіші 30 пайызға жетеді. Президенттің айтуынша, билік партиясының бағдарламасы тамыз айындағы жолдауымен үндес. Ал «айтқанымыз ешқашан орындаусыз қалмайды» деген «Нұр Отан» алдағы 5 жылға арналған жоспарына 21 триллион жұмсамақ. Аймақтарда 800 мектеп салып, жолдарды жөндеп, ауылдағы спортқа көңіл бөлеміз деген партия білім мен ғылымды дамытуға арналған грант санын көбейтіп, студенттердің шәкіртақысын 2 есеге көбейтеді екен. Дегенмен, партия бюджеттің тиімсіз жұмсалуын қатаң бақылауға алып, бірқатар субсидиялар мен жеңілдіктерді қысқартпақ. Ал ұлт байлығы халыққа теңдей бөлінбек.ҚАСЫМ-ЖОМАРТ ТОҚАЕВ, Қазақстан Республикасының Президенті: – Мұнайға тәуелді емес тапшылық қысқартылып, ұлт байлығы әділ түрде бөлініп беріледі. Нұр-Сұлтан мен Алматы қалаларында екі көпбейінді инновациялық клиника мен өңірлердегі медицинаны дамыту үшін барлық облыстарда 20 заманауи медициналық орталық салынады.Ал партия төрағасы жиын соңында сөз алып, тарихқа бойлай түсті. Елдегі тұтастық пен тәуелсіздіктің оңайлықпен келмегенін айтқан Нұрсұлтан Әбішұлы тыныштықты сақтап қалу басты мақсатымыз деді. Көшеге топтасып мәселесін айтып шығатындардың ісінен пайда жоқ деген Назарбаев елде аналар мен отбасы мәселелеріне арналған агенттік құру керек деген ұсынысты қолдап, тіпті, оны Үкімет қарауына ұсынды. НҰРСҰЛТАН НАЗАРБАЕВ, «Нұр Отан» партиясының төрағасы: – Кезінде бұл партияны билік пен халық арасындағы дәнекер болсын деп құрдық, елге артылған нардың жүгін тек Нұр Отан ғана көтере алады. ГҮЛНАЗ САЙЛАУҚЫЗЫ, тілші:– Саяси науқанға білек сыбана кіріскен билік партиясы биыл құрамын жаңартып, жасартыпты да. Тіпті, партия «Жас Отан» жастар қатарынан да кандидаттар ұсынған. Дегенмен бесінші және алтыншы сайланымда депутат болғандар да тізімге қайта еніпті. Ал үшінші сайланымнан бері мәжілістегі креслосынан ажырамай келе жатқан Бекболат Тілеухан да қайта таласқа түспек. Саясатқа араласуға қадам жасағандар ішінде журналист Жанарбек Әшімжан мен айтыскер ақын Аманжол Әлтаев та бар.Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Дариға Назарбаева үлкен саясатқа қайта оралуы мүмкін канала Информбюро 31