11 адам мерт болған «Қордай қақтығысына» қатысты сот басталды

Бүгін Жамбыл облысы, Қордай ауданында болған қақтығысқа кінәсі бар деп күдікке іліккен азаматтардың соты басталды. Соталды тыңдалым Тараздағы тергеу изоляторында өтіп жатыр. Қазір 158 тұрғын, 20 полицей жарақат алып, 11 азамат қаза тапқан іс бойынша 51 адам айыпталушы ретінде танылған. Ал 10 азаматқа қасақана кісі өлтірді деген кінә артылып отыр. Бірақ сезіктілер прокурор таққан айыппен мүлде келіспейтіндерін айтады.
НҰРБОЛАТ ЖАҢАБЕКҰЛЫ, тілші:
– Таңертеңнен Тараздағы тергеу изоляторында қарбалас болып жатыр. Өйткені, Қордай ісіне қатысты соталды тыңдалым басталған мекемені күштік құрылымдар қоршауға алып, іргелес көшелер толық жабылған. Судья процестің ашық өтетінін жариялады. Сотқа қатысқысы келген азаматтар алдын ала ПТР-тест тапсыруға міндеттелген. Бірақ БАҚ өкілдері сот залында 10 минуттай ғана отырды. Одан кейін журналистерге іс барысын қалалық соттың арнайы залында онлайн форматта бақылауға тура келді. Сондай-ақ, сотқа тест нәтижесі жоқ айыпталушылардың туыстары да кіргізілген жоқ.
НҰРБОЛ ТЕРГЕУІСОВ, айыпталушы, Жәнібек Бақытжанның туысы:
– Бізге паспорт заверить етіңдер деді нотариуспен. Еттік. Сосын коронавирусқа ал деді. Қан алады екен, одан кейін тілден алды. Куәлік деді. Алдырдық. Екі адамға алып келдік, кірмейсіздер деді. Ешкім кірмейді деді.
НҰРБОЛАТ ЖАҢАБЕКҰЛЫ, тілші:
– Алғашқы тыңдалымда 51 күдіктіні таныстырудың өзіне бірнеше сағат уақыт кетті. Бес сезікті жаппай тәртіпсіздікке шақырды, 6-ы ұйымдастырды тағы бір азамат полицейдің өміріне қауіп төндіру дерегі бойынша жауапқа тартылып отыр. Іс 400 томнан тұрады. Процеске 4 мемлекеттік айыптаушы, 60 адвокат және 50-ден астам қосымша қорғаушы қатысып жатыр. Тыңдалым кезінде айыпталушы Мұрат Қибеков судьяға сенімсіздік білдіріп, оны ауыстыруды сұрады. Ол ақыл-есі кем қызы мен жасы келген анасының жалғыз қамқоршысы екенін айтып, кепілдікпен босатуын өтінген. Алайда онысы мақұлданбапты. Сондай-ақ, Қибеков тергеудің алты айға созылуына да наразылық білдірді. Бірақ сот алқасы айыпталушының уәжі негізсіз деп танып, судья Айдарбек Замбаевты қалдырды.
АЙЫПТАЛУШЫ МҰРАТ ҚИБЕКОВТІҢ ҚОРҒАУШЫСЫ:
– Құрметті сот, қазіргі таңда Қибековтің кінәсі дәлелденбеген. Беттестіру кезінде куәлардың жауабына сәйкес Қибеков өртеу іс-әрекеттерін жасамаған. Керісінше, тастаңдар, қайтыңдар деп оларды сабырға шақыру әрекеттерін жасаған.
НҰРБОЛАТ ЖАҢАБЕКҰЛЫ, тілші:
– Процеске небәрі жеті жәбірленуші келген. Олардың жалпы саны белгісіз. Алғашында 366 адам жәбірленуші ретінде танылғаны хабарланған еді. Ал жалпы сезіктілерге «Жаппай тәртіпсіздік», «Қаруды, оқ-дәрiлердi, жарылғыш заттарды заңсыз иемдену, сақтау», «Қорқытып алу», «Қарақшылық» секілді баптар бойынша айыптар тағылған. Ал он азамат қасақана кісі өлтірді деген күдікке іліккен. Олар прокурорлар таққан айыппен мүлде келіспейтіндерін айтты.
НҰРБОЛАТ ЖАҢАБЕКҰЛЫ, тілші:

– Әзірге кезекті сот отырысының қай күнге белгіленгені хабарланған жоқ. Алдағы уақытта біз бұл істің барысын бақылауымызда ұстаймыз.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео 11 адам мерт болған «Қордай қақтығысына» қатысты сот басталды канала Информбюро 31