Жамбыл облысында сел жүріп, бір ауыл су астында қалды

Жамбыл облысында сел жүріп, бүтін бір ауыл су астында қалды. Күннің кенеттен жылынуынан Қаратау жотасындағы қар еріп, оған нөсер жауын мен қатты жел қосылған. Таудан аққан тасқын су екі кештің арасында майтөбеліктердің мазасын кетірді. Ауыл тұрғындары қыс ортасында қора-қопсысыз қалды. Тіпті кейбірінің жағатын отын, көмірлері су астында қатып қалыпты.
НҰРБОЛАТ ЖАҢАБЕКҰЛЫ, тілші:
– Күн күрт ысып, тау жоталарындағы еріген қар суы сай - саламен жүгіріп, кешкі алтылар шамасында мына жолдың жиегіне жеткен. Сол сәтте қатты жел тұрып, арты нөсер жауынға ұласады. Ақыры жиылған су жолдан асып, іргедегі Майтөбе ауылына дейін жетеді. Ал ауыл азаматтары жедел төтеншеліктерге хабарласқан. Мамандар, таудан аққан судың арнасын бұру үшін міне мынадай қосымша арық қазыпты. Алайда ол кезде бәрі де кеш болған. Өйткені, елді мекенде сел жүріп өткен.
САЛТАНАТ ЖОЛТАЕВА, Майтөбе ауылының тұрғыны:
– Мына қорадағы көміріміз қатып қалды. Су қораға кіріп кетті. Оны түнде күйеуім сағат төрт жарымға дейін шамасы келгенше арық істемек болды. Мына тоң боп жатыр дейді ғой жер. Содан су сіңбей жатыр.
ГҮЛНҰР СЕГІЗБАЕВА, Майтөбе ауылдық округінің тұрғыны:
– Жылы боп кетті табанда. Жаңбыр, жел боп сол суды айдап келді ғой. Таудың етегіндегі судың бәрін. Сөйтіп үйіміздің бәрін шайып кетті, қорамызды.
Селді тоқтату үшін тұрғындар ауыл ішіндегі арықтарды тазалап, суды ескі арнаға бұрыпты. Ал төтеншеліктер жол үстіне жүк көліктерімен шағыл тас төгіп, арнайы техникалармен жыраларды кеңейткен. Бірақ тасқынның беті қайта қоймаған. Сондықтан, бірнеше арық қазылыпты.
ЕРБОЛ СМАЙЫЛОВ, Берікқара ауылдық округінің әкімі:
– Су деңгейі көп болғандықтан екінші арық қаздық. Оның екінші жүйесі барады да екінші тау жотасынан келген Амансай өткеліміз бар. Амансайдың арығы арқылы көл жағаға кетеді. Ол жақтан ешқандай қауіп жоқ.
Ауыл әкімі елдімекен тұрғындарына қауіп төніп тұрған жоқ деп сендірді. Айтуынша, бұл оқыс оқиға күннің күрт жылынуы мен қатқан тоңның жібімеуі салдарынан болған. Енді мамандар, ауылға кіреберістегі арықтарды жалғап, қосымша өткелдер жасамақшы екен. Майтөбеде бұған дейін 1985 және 2000 жылдары дәл осындай сел жүріпті.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Жамбыл облысында сел жүріп, бір ауыл су астында қалды канала Информбюро 31