Қазақстанда карантин тағы күшейтіледі

Қазақстанда коронавирустың екінші толқыны басталды. Карантин тағы да күшейтіле түспек. Өйткені жасыл аймақта болған еліміз қайтадан сары аймаққа өтті. Мұны мәлімдеген Бас санитария дәрігері ауырған науқастарға дайындалған төсек-орындардың 30 пайызға толып кеткенін айтты. Бұған дейін Алексей Цой ковидке шалдыққандарға арналған орынның 70 пайызы толса, елде төтенше жағдай жариялануы мүмкін деген еді.
Соңғы айларда елімізде эпиджағдай нашарлап кетіпті. Тәулігіне кем дегенде бір, әйтпесе алты адамға дейін коронавирустан көз жұмады екен. Күніне 700-ден астам адамнан ковид шығады. Денсаулық сақтау министрлігі вирус, әсіресе, Атырау, Алматы және Қарағанды облыстарында өршіп тұр дейді. Ал күні кеше Ақмола және Қостанай облыстары қызыл аймаққа кірді.
ЕРЛАН ҚИЯСОВ, ҚР Бас санитария дәрігері:
– Қалыптасқан эпидемиологиялық жағдайды ескере отырып, бүгінгі күні халықтың жиналмауына, байланыстарын азайтуға бағытталған карантиндік шараларды күшейту бойынша шаралар қарастырылуда, қаңтарға мемлекеттік шекарада КВИ-ға оң нәтижемен 859 адам анықталды.
Сондай-ақ Қиясов Англияда анықталған вирустың жаңа штаммы бізге әлі келе қойған жоқ деп елге басу айтты. Алайда бұл босаңсуға негіз емес дейді министр орынбасары. Өйткені жаңа вирус ковидке қарағанда ауа арқылы 70 пайыз жылдам тарайды екен.
ЕРЛАН ҚИЯСОВ, ҚР Бас санитария дәрігері:
– Бүгінгі күні вирус Австралия, Дания, Италия, Исландия, Нидерланд, Ресей секілді бірқатар елдерге тарап кеткен. Алдын ала зерттеулерге сәйкес, мутацияға ұшыраған вирусқа әсіресе жастар шалдығады.
Ал қазіргі эпиджағдайға байланысты вакцинация бойынша жұмыстар жедел түрде жүргізіліп жатқанға ұқсайды. Алайда министрлік шетелден қанша препарат сатып алынатынын әзірге құпия сақтап отыр. Сондай-ақ министрлік "жаз айларында өлім-жітімнің дендеп кетуіне адамдардың өздері кінәлі, мамандарда айып жоқ" дейді.
ДИНАГҮЛ БАЕШЕВА, ҚР жұқпалы аурулар бойынша маманы:
– Жұрттың көбі бұл ауру жоқ, адамнан адамға тарамайды, той думан көбейіп кетті, солардың бәрі бірден дәрігерге келгенде көмек жасауға үлгере алмады. Мұндай жағдай Америкада, Италияда бүкіл дүниежүзінде болып жатқан нәрсе.
Ал күні кеше жоғары сынып оқушылары штаттық режимде білім алуға көшкен болатын. Енді министрлік оқушылардың мектепте тамақтану мәселесін де шешпек. Нақты жауап жақын күндері жарияланбақ.
Гүлназ Сайлауқызы, Дидар Елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Қазақстанда карантин тағы күшейтіледі канала Информбюро 31