Балаларын сабаққа жібермей қоятындай ата-аналарға мектеп басшысы несімен ұнамай қалды?

Қызылорда облысы Жаңақорған ауданында жүздеген тұрғын мен бірнеше ұстаз мектеп директоры орнын босатсын деп бас көтерді. Табандап талап қойған ата-аналар басшының кесірінен білім сапасы төмендеп кетті десе, мұғалімдер директордың ұжымды ұйымдастыра алмауы әбден шаршатты деп ашынды. Балаларын тіпті сабаққа жібермей қарсылық танытатынындай ауыл ата-аналарына директор несімен ұнамай қалды? Абай Нұржанұлы біліп келген еді.
Бұл Шалқия ауылының мектеп директорына наразы тұрғындары. Білім ұясының алдына жиналған жүздеген тұрғын қарсылықтарын білдіру үшін қыстың суығын да, карантин тәртібін де елемеді. Ата-аналар мектепке қазіргі директор басшы болып келгелі білім деңгейі төмендеп кетті дейді. Айтуларынша білім ұясының басшысы ұжымның ауызбірлігін кетіріп, ұстаздарды жік-жікке бөлумен келеді. Бұл оқушылардың білім алуына кедергі болды деген ата-аналардың кейбірі тіпті балаларын директор кетпей мектепке жібермейміз деп шешіпті.
ГҮЛЖАН ҚАМБАРБЕКОВА, ата-ана:
– Мен жібермеймін. Білім жоқ. Өйткені апайы өзінің басымен әуре болып жүр. Санаған жоқпын. Бірақ почти ата-аналардың жартысы балаларын жібермей отыр.
ГҮЛЗЕЙНЕП АМАНБАЕВА, тұрғын:
– Басшы болғаннан кейін ұстап, білімді требовать ету керек. Бұларда қазір ондай ешкім жоқ.
Жаңа оқу тоқсанында көп оқушының сабаққа келмей жүргенін ұстаздар да растайды. Мұғалімдердің бір бөлігінің пікірінше, директор ұжымдағыларды бөліп-жарып, жұмыстарының әбден берекесін қашырыпты. Одан қалды мектеп қызметкерлері директордың тапсырмасымен бір-бірін аңдып, балаларға білім беру жайына қалды дейді.
БАЯН ТӨЛТАЕВА, №86 орта мектеп директорының орынбасары:
– Білімді қойған, қазір бәрі бірін-бірі аңдып кеткен. Несін сұрай бересіздер? Біз қазір екі адам жолығып сөйлесуге қорқамыз. Өйткені аңдып жүрген бір адам. Бізді есіктің алдынан аңдып отыратын вахтерлардың бәрі өзінің сіңілілері суретке түсіріп.
Осылайша наразылық білдіріп жиналған бірнеше тұрғын талаптарын директордың өзіне айту үшін білім ұясы ғимаратына баса көктеп кірді. Ал мектепке екі жылдай бұрын басшы болып келген директор шағымданушылардың талаптары негізсіз дейді. Айтуынша ол осы уақыт аралығында білім ұясы үшін қаншама тер төгіпті. Ал ұжымның қырық-пышақ болып бөлінуіне мұғалімдердің өздерін кінәлі санайды.
ФАРИДА НИЯЗОВА, №86 орта мектебінің директоры:
– Менен заңбұзушылық болса, мені басшыларым бұл жерде қоймас еді. Мен заңды әрекет жасаймын. Кез келген құжатымды заңды жасап отырамын. Және мен заңды әрекет жасаған соң соған мұғалімдер көндіккісі келмейтін сияқты.

Бірақ аудандық білім бөлімі мектеп ғимаратына жазда жасалған жөндеу кезіндегі кемшіліктерге байланысты ғана директорға тәртіптік шара қолданбақшы. Ал аядай ауылдағы қырық кісі бір жақ, директоры бір жақ болған бұл дау толық шешілмей кей оқушылар білім ұясының табалдырығын әзір аттамайтын секілді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Балаларын сабаққа жібермей қоятындай ата-аналарға мектеп басшысы несімен ұнамай қалды? канала Информбюро 31