Енді екі көлік соқтығысып, адам мерт болмаған жағдайда жүргізушілер соттаспай шығын өтей алады

Енді екі көлік соқтығысып, адам жарақат алмаса екі тарап та сақтандыру компаниялары арқылы полиция шақырмай, соттаспай-ақ, шығындарын өтеп ала алады. Мамандар осындай халықаралық жүйені қазір заңға енгізбек. Алайда, оның бірнеше талаптары бар. Айта кетейік, былтыр сегіз ай ішінде елімізде 8 307 көлік апаты тіркелген. Соның кесірінен он мыңнан аса адам жарақат алса, 1258 азамат мерт болыпты.
Жантүршігерлік апат болмаса, яғни, адам мерт болып немесе жарақаттанбаса көлік иелері соттасып әуре болмасын дегенді депутаттар ұсынған. Мұндай Еурохаттама жүйесі Еуропа мен көршілес Ресей және Өзбекстанда бар. Мысалы: екі көлік соғылып қалғанда ішінде отырған адамдарға еш зақым келмесе екі жүргізуші сақтандыру компаниясынан көлігінің сынған, сырылған жеріне ақша өндіре алады. Жол полициясын шақырып, хаттама толтырып, соттаспайды. Бірақ, көліктің шығыны үш жүз алты мың үш жүз теңгеден аспауы тиіс. Ал егер, осы жүз айлық есептік көрсеткіштен асатын болса полиция шақырып, сот арқылы шешеді.
САҒИ ӘЖІБЕК, ҚР ҚНРжДА сақтандыру нарығын дамыту басқармасының басшысы:
– Егер адамның өміріне не денсаулығына зиян келтірілігенде Европротокол рұқсат етілмейді. Көліктердің соқтығысуына кінәлі адамды екі көлік иелері өзара шешіп алуы керек. Егер көлік иелері кінәлі жақты анықтай алмаса Европротокол емес, қазіргі қолданыстағы тәртіппен шешу керек. Бір автокөліктің иесі қазіргі тәртіппен жасайтын болса олай да жасауға болады.
Кейбір жүргізушілер мұндай жүйенің болғаны дұрыс десе, кейбірі материалдық шығынды сот арқылы өндіргеніміз жөн деп отыр.
Автосақтандыру компаниялары әзірге ешқандай ақпарат айтып, позициямызды білдіре алмаймыз деді. Ал, Еурохаттаманың бүге-шүгесін қазір депутаттар мамандармен талқылап жатыр. Заң жобасының мәжіліс қарауына қашан баратыны белгісіз. Заң қабылданған соң арнайы мобильді қосымша жасау керек, Мемлекеттік деректер қорын интеграциялап, сақтандыру компанияларының ақпараттық жүйесін жетілдіру қажет. Жауаптылар бұған кемінде бір жыл керек деп отыр.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#апат #сақтандыру #көлік #шығын

Видео Енді екі көлік соқтығысып, адам мерт болмаған жағдайда жүргізушілер соттаспай шығын өтей алады канала Информбюро 31