Мәжбүрлі түрде үйлерінен көшуге қарсылық білдірген қарағандылықтар жылусыз, жарықсыз, сусыз қалды

Қарағанды облысында шенеуніктер қақаған аязға қарамастан Весовая және Крестовский ауылындағы тұрғындарды жылусыз, жарықсыз және сусыз қалдырған. Себеп - әкімдіктің айтқан жеріне көшуден бас тартқан тұрғындарды, осылайша үйлерін босатуға мәжбүрлеу екен. Пайдалы қазбалардың өндірілуіне байланысты екі елдімекендегі халық түгел басқа жаққа қоныс аударуы керек болған. Бірақ, қаңыраған ауылда сегіз отбасы қарсылық білдіріп, көштен қалып қойған.
Кеңес кезінде мыңдаған тұрғын қоныстанып, аты дүркіреген Крестовский және Весовая ауылдарының бүгінгі сиқы осы. Қаңыраған ауылда тіршілік тоқтаған, көшеде көзге түсер тірі жан жоқ. Ал, қаңырап қалған бос үйлердің барлығы әбден тозып біткен. Осындай адам шошырлық күйге түскен екі ауылда тек сегіз отбасы өмір сүріп жатыр. Көштен қалған оларды, былтыр шенеуніктер тез арада басқа жаққа қоныс аудару үшін жылу мен судан ажыратыпты. Тіпті бағандағы желілерді де түбіне дейін кесіп кетті дейді тұрғындар.
СЕРГЕЙ ТОНОЯНЦ, тұрғын:
– Былтыр наурыздан бері үйімде не жарық, не су жоқ. Бізді бұл жерден кетіру үшін шенеуніктер барлығынан ажыратты.
АНДРЕЙ ГАЛУШКИН, тұрғын:
– Жылусыз қалдырғандықтан, қапқа кіріп ұйықтаймын. Қала жақтан газ баллонын әкеліп, үйді үш жерден жылытып отырмыз. Бізді осындай қиын жағдайға қалдырған шенеуніктер мен "Қазақмыс" өкілдерін келіссөз жүргізуге шақырамыз.
Көштен бас тартқандардың айтуынша, олар үйлерін қараусыз қалдырып, алысқа да ұзай алмайды. Өйткені адам жоқта әлдекімдер баспаналарды бұзып, өртеп кеткен кездер де болды дейді. Бұл тұрғындарға шенеуініктер Сәтбаев қаласынан өтемақы ретінде пәтер мен үй берген. Бірақ, жаңа қоныс ешқайсының көңілінен шықпапты.
ВИКТОР ДЖУРА, тұрғын:
– Көшуден бас тартқан соң, әкімдіктегілер рұқсатсыз үйімнің күл-талқанын шығарып бұзып тастады. Сәтбаев қаласынан коттедж үй ұсынды. Бірақ оның шаршы метрі аз.
АННА ДАВЫДОВА, тұрғын:
– Бізге екі бөлмелі екі пәтер беріп құтылғылары келеді. Мен сонда күйеуім мен балаларымнан бөлек өмір сүруім керек пе? Өмір бойы жер үйде тұрған мен неге пәтерге көшуім керек?
"Қазақмыс" холдингі бұл мәселеге қатысты әкімдіктегілер жауапты деді. Ал шенеуніктер тұрғындарды алты рет сотқа бергендерін айтады. Барлығында сот тұрғындарға берілген өтемақыны алып, көшіп кету туралы шешім шығарған.
ШАПАҒАТ ӘУБӘКІР, Сәтпаев қаласы әкімінің орынбасары:
– Бүгінгі күнде Жезқазған кентінде қалып отырған сегіз отбасыны көшіруге қатысты сот шешімі орындалмай отыр. Тұрғындар мемлекет мұқтажы үшін алынған үйлерде заңсыз тұрып жатыр. Соттың шешіміне сәйкес, аталған жылжымайтын мүлік Сәтбаев қаласының коммуналдық меншігіне өтіп, әділет органдарында тіркелген. Бұл дегеніміз бұрынғы мүлік иелерінің құқы аяқталды.
Еске салсақ, пайдалы қазбалардың өндірілуіне байланысты Весовая, Крестовский және Перевалка ауылдарының тұрғындары 2010 жылдан бастап, 2021 жылға дейін түгел көшірілуі керек болған. Бұл мақсатқа бюджеттен 35 миллиард теңгеден астам қаржы бөлінген еді.
Диана Сапарқызы
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Мәжбүрлі түрде үйлерінен көшуге қарсылық білдірген қарағандылықтар жылусыз, жарықсыз, сусыз қалды канала Информбюро 31