Әлеуметтік желіде қазақстандықтар жаңа жасақталатын үкімет құрамын талқылауға көшті

Әлеуметтік желіде жұрт жаппай жаңадан жасақталатын үкімет құрамын өзара талқылауға көшті. Қазір кімнің, қайда тағайындалатынына қатысты болжам көп. Ел Байбек, Мәмин, Бозымбаевтың аты-жөнін атап жатыр. Дегенмен, жұрт ендігі үкіметке: "қабылдайтын шешімдерін бізбен ақылдассын" деп отыр. Ал кейбір сарапшылар халықтың сеніміне кірмей, үкіметке әлеуметтік бағдарламаларды жүзеге асыру қиынның-қиыны болады деп ескертуде.
Орта есеппен бір жылда 10 пайызға шарықтап кеткен баспана бағасы мен жұмыссыздық жастардың жігерін әбден жасытып бітті дейді ел. Жаңадан жасақталатын үкімет енді ақылға қонымды әлеуметтік бағдарламаларды шұғыл енгізбесе, ел ішінде қылмыс дерегі көбеюі мүмкін деген пікірде. Тым құрығанда, жабылып қалған өндіріс ошақтарын қайта жаңғырту керек дегенді айтады олар.
Бір жылдың ішінде 10 пайызға әлсіреген ұлттық валюта, 3 миллиард доллардан астам қаражатқа кеміген Ұлттық қор-биыл үкіметтің босаңсуына мұрша бермеуі тиіс дейді сарапшылар. Бастысы 450 мыңнан астам жұмыссыз жүрген азаматты қайта еңбек нарығына тарту маңызды деп есептейді Рахым Ошақбаев.
РАХЫМ ОШАҚБАЕВ, Экономист:
– Шағын және орта кәсіпкерлердің тым құрығанда несие алу мүмкіндігін арттыру қажет. Ал баспанаға қатысты «Нұрлы жер» мемлекеттік бағдарламасы қайта өзгеруі керек деп есептеймін.
Ал саясаткер Дос Көшім үкімет әуелі, халықтың сеніміне кіруі қажет дейді. Содан кейін, азаматтарды пандемия жағдайында жұмыс істеуге көшіретін нақты шешімдерді қабылдау керектігін айтты.
ДОС КӨШІМ, Саясаткер:
– Індеттің кезіндегі экономикалық, әлеуметтік мәселелерді толық құлдыратып, қиратып алмауға тырасатын жұмыстарды бастау керек. Ең болмаса халыққа көрсету керек, айту керек. Әйтпесе, біз тағы да он жылға кейін кету қауіпіміз әлі бар.
Сарапшылар, жеке тұлғалардың үш айдан бері 420 миллиард теңге қарызын банкке уақытылы қайтармағанын Үкімет ескеріп, "дағдарысқа қарсы шарасын" қабылдауы қажет деп отыр. Ал бизнес өкілдерінің қаржы институттарына қайтара алмай жүрген берешегі 550 миллиард теңгенің шамасында екен.
Әйгерім Ердәулет, Геннадий Лукин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Әлеуметтік желіде қазақстандықтар жаңа жасақталатын үкімет құрамын талқылауға көшті канала Информбюро 31