Шығыс Қазақстанда Ертістің суы көтеріліп кетті

Шығыс Қазақстанда Ертістің суы көтеріліп кетті. Мұз үстіне жайылған су өзен жағасында орналасқан Глубокое ауданындағы Уварова ауылының іргесіне жеткен. Жайылған суды тоқтату үшін жағаға топырақ төгіліп, құм салынған қапшықтардан бөгет жасалып жатыр. Бірақ ауыл халқы қазір нақты әрекет жасалмаса, қауіптің бәрі алда болады деп қорқып отыр.
Уварова ауылында алты жүздей шаңырақ бар. Ертістің жағасындағы елдімекенге судың жақындап келіп қалғанына бірнеше күн болған. Әсіресе ауыл шетіндегі үйлерге қауіп төніп тұр. Тұрғындар бір шара қолданылмаса ертеңгі күніміз қалай болады деп алаңдаулы.
ОЛЬГА ПОПОВА, Уварова ауылының тұрғыны:
– Түнде алаңдап ұйықтай алмаймын. Су деңгейі тіпті көтеріліп кетсе, үйімізді сөзсіз басып қалады. Дүние-мүлік, киім-кешегімізді қайда апарамын. Үйімде балалар бар. Кішкентай немерелерім де бар. Олар да үрейленіп отыр.
Дегенмен, дәл қазір жергілікті әкімдік қызметкерлерімен бірге халық та қарап отырған жоқ. Су деңгейі көтеріле бастағаннан жағаны бекітуге кіріскен.
ВАСИЛИЙ БЕЛОУСОВ, Уварова ауылының тұрғыны:
– Біз су жағасындағы үй иелері келіп, топырақ алып бөгет жасағысы келсе оларға көмектесеміз. Бүгін таңертеңнен бері осында жүрміз. Мына жатқан топырақты қапшыққа салып, қазір тағы да жағаны бекітеміз.
Халық қатқан мұзды жарып, бөгелген суды ағызбай қауіптің беті сейілмейді дейді. Бірақ ауыл әкімі мұнымен келіспейді.
ЕРЛАН ЖҰМАҒҰЛОВ, Ертіс ауылдық округінің әкімі:
– Дәл қазір мұзды жарған дұрыс емес. Біздің ауылдан төмен орналасқан елді-мекендерді су басуы мүмкін.
Ал мамандар өзен арнасы тазартылып, жағасы тереңдетіліп қазылса мұндай мәселе болмас еді дейді. Бірақ оған тиісті мекемелердің рұқсаты мен көп қаржы да керек екен. Ал әзірге ауыл әкімі су ағып кетер деп үміттеніп, ауыл халқы үреймен күн кешуде.
Жанболат Санияз
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Шығыс Қазақстанда Ертістің суы көтеріліп кетті канала Информбюро 31