«Қазақстанның ерлері қазаншы, әйелдері базаршы болып кетуі әбден мүмкін»

Ал сайлау аяқталғаннан кейін онсыз да бір жылда 15 пайызға құлдыраған теңге тағы да әлсіреп кетуі мүмкін. Тіпті, кейбір сарапшылар Қазақстанды 90-шы жылдардағыдай экономикалық дағдарыс күтіп тұр дейді. Әйтсе де, билік әлемдік экономикалық қиындықтарға қарамастан қаржылық қысылтаяңнан алып шығатын бес жылдық бағдарлама ойластырып қойдық дейді. Кей сарапшылар бір доллардың құны 440 теңгеден аспайды деп отыр. Бұл сарапшылардың әзірге оптимистік көзқарасы. Қымбатшылық пен жұмыссыздық. Бұл Қазақстанды келер жылы күтіп тұрған ахуал. Сарапшы Меруерт Махмұтова, 90-шы жылдардағыдай ерлер қазаншы, әйелдер базаршы болып кетуі әбден мүмкін дейді. Бірақ үкімет бұған жол бермес үшін 21 триллион теңге қаражат қарастыратындықтарын қазірден айтып жатыр. Десе де, интервенциясыз ұлттық валюта тым құнсызданып кетуі ықтимал дейді сарапшы. Ал АҚШ долларынан бас тартып, Ресей рублімен есептесу мүмкін емес. Өйткені, Еуразия экономикалық одағы аясында Ресейден импортталатын тауардың үлесі 40 пайызды құраса, Қазақстаннан экспортталатын өнім небәрі 8 пайыз шамасында екен. Долларсыздандыру саясатын жүргізу-мұнайды көк қағазбен сататын, ұлттық қордың қаржысын долларлық активтерге салған елге жығылғанға жұдырық болады дейді. МЕРУЕРТ МАХМҰТОВА, экономист:– Құрама штаттарда инагурация өтеді. Байден Ресейге байланысты жаңа санкция салады. Навальныйды уландырғаны үшін. Ол химиялық қаруды пайдаланғаны үшін. Ол химиялық қаруға мүлдем шектеу салынған. Осыған байланысты Ресей экономикасы соның зардабын көреді. Ал сарапшы Серік Қозыбаев АҚШ-тың Ресейге салатын санкциясы саяси тұлғалармен байланысты болмайды дейді. Бірақ Байденнің бұған дейін Ресей мен Қытайға көзқарасының қатаң болатындығын бірнеше рет ескерткені-ақ экономикаға кері әсер ететіні сөзсіз дейді. Ал мұнай бағасын ОПЕК елдері мен Ресей өзара тұрақты етіп ұстап тұра алады. Сондықтан, қара алтын құнының бір баррелі 45 долларға шақталуы мүмкін екенін алға тартады. СЕРІК ҚОЗЫБАЕВ, экономист:– Доллардың теңгеге шаққандағы бағамы келесі жылдың бірінші тоқсанында 430-440 теңге шамасында болады деп ойлаймын. Бас банк оған интервенция жасап қана ұстап тұра алады. Мен мұны дұрыс шешім деп есептеймін. Биыл ұлттық банк интервенция жасамағанда рубль секілді теңге де бір жылда 25 пайызға құнсызданып кетуі мүмкін еді ғой. Қайткен күнде де короновирус әсері азаймай, ел экономикасы тұрақтамайды дейді сарапшы. Ал 2021 жылы әлемдік экономика кемінде 7 триллион доллардан қағылады. Бұл экономикалық сарапшылардың оптимистік болжамы.Әйгерім Ердәулет, Ринат Әбілқайыров
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео «Қазақстанның ерлері қазаншы, әйелдері базаршы болып кетуі әбден мүмкін» канала Информбюро 31