76 миллион желге ұшқалы тұр

Қызылорда облысына жаңа әуежай салу үшін осыған дейін бюджеттен жұмсалған 76 миллион теңге ауаға ұшқандай болғалы тұр. Оған себеп дайын тұрған жобадан облыс әкімі Гүлшара Әбдіқалықованың «өте қымбат» деп бас тартуы. Әкім қазір ақшаны үнемдеу үшін ескі әуежайды ретке келтіреміз деді. Ал аймақ басшысының үнемшілдігінен алдыңғы жобаға жұмсалған ақшалар далаға кететін болды деп ашынады тұрғындар. ГҮЛШАРА ӘБДІҚАЛЫҚОВА, Қызылорда облысының әкімі:– Осыған дейінгі жобаға жоспарланған 18 миллиард теңге өте қымбат болды. Біз қазіргі дағдарысқа орай одан бас тарттық. Түркістан мен Байқоңырда үлкен әуежайлар бар. Соны ескеріп қазіргі әуежайды үлкейту үшін жұмыс жасалады. Ал оның жобалық - сметалық құжаттары осы жылы дайын болады.Апта басында елордадағы сұхбатында Гүлшара Әбдіқалықова Қызылордаға жаңа әуежайдың салынбайтынын айтқан еді. Алдыңғы әкімдердің бірнеше жылғы жоспарын қолдамаған басшы, одан азырақ ақшаға ескі әуежайды қайта жөндеу жұмыстарын жүргіземіз деді. Оны жобалау үшін қазірдің өзінде бюджеттің 30 миллион теңгеден аса ақшасын жұмсапты. Бірақ осыған дейінгі әкімдер жаңа әуежайдың тек концепциясын дайындауға ғана бюджеттен 76 миллион теңгені шығын қылған екен. ЛЯЗЗАТ БАҚТЫБАЕВА, қоғам белсендісі: – Егер 2015-2017 жылдары аэропорт салуға көзделген қаржы болмаса, республикамен шешілмеген мәселе болса не себепті облыстық бюджеттен ақша жұмсалынған. Осылайша тұрғындар бюджетке тиесілі миллиондардың есепсіз жұмсалып жатқанына қынжылады. Ал жауапты басқарма басшылары қазір облысқа бәрібір кең әуежай керек дейді.ДАМИР ТІЛЕУОВ, Қызылорда облыстық жолаушылар көлігі және автомобиль жолдары басқармасы басшысының орынбасары:– Қазіргі терминалдың тарлығы ең басты мәселе. Жолаушыларға тиісті деңгейде қызмет көрсетуге мүмкіндік болмай отыр.Жауапты басқарма ескі әуежайды кеңейту үшін республикалық бюджеттен тағы ақша сұрамаймыз дейді. Ал 76 миллион теңге жұмсалған жаңа әуежайдың жобалау жұмысы жалғасын таба ма, жоқ па белгісіз. Облыс белсенділері жоспарсыз жұмыс істеген басшылардың кесірінен қаншама ақша ел игілігіне емес, желге ұшатын болды дейді.Абай Нұржанұлы, Рахымжан Ысқақов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео 76 миллион желге ұшқалы тұр канала Информбюро 31