Павлодарда жылу желілерінің 90 пайызға жуығының тозығы жеткен

Павлодарда жылу желілерінің 90 пайызға жуығының тозығы жеткен. Кесірінен қыс түссе ескі құбырлар қайта-қайта жарылып, апаттық жағдайлар жиілеп тұр. Ал тұрғындардың қақаған аязда бүрсең қағып отыратын күндері көп. Қазір қаладағы 783 шақырым жылу магистралінің бар - жоғы 16 пайызы іске жарамды. Мұны қалалық әкімдік өкілдері де растап отырғанымен ескі құбырларды жөндеуге асығар емес.
Павлодардағы әбден ескірген құбырлар қысымға шыдас бермей жарылып жатыр. Соның салдарынан екі көп қабатты тұрғын үй, 20-шақты жер үй, Достық үйі мен балалар музыка мектебі жылусыз қалған. Ал тұрғындар жылда қыста көретін күніміз осы дейді.
Қазір ақауды қалыпқа келтіру үшін «Павлодар жылу желілері» жұмысшылары жанталасып жатыр. Мамандар құбырлардың барлығы ескіргенін, соның кесірінен істеген жұмыстарының өнбейтінін айтады. Сөздерінше, апатты жағдайларды болдырмау үшін жылу магистралін түгел жаңарту керек. Әйтпесе, тұрғындардан арыз-шағым толастамайды. Ал тозығы жеткен құбырлар қала әкімі Асайын Байхановтың да мазасын қашырғандай. Ол былтырғы сұхбатында апаттарға кепілдік бермейтінін айтқан.
АСАЙЫН БАЙХАНОВ, Павлодар қаласының әкімі:
– Жүйелердің 50 пайызы 100 пайыз ескірген. Қалған 50 пайызы 60 ескірген. Сонда орташа 83 пайыз болады. Қай жерге, қай уақытта болсын апат болуы мүмкін. Оған ешкім гарантия бермейді.
Дегенмен, әкім биыл жылу желілерін ретке келтіруге уәде берген. Бірақ, негізгі магистралдің тек 4 шақырымы ғана жөнделмек.
АНУАРБЕК АМАНОВ, Тұрғын үй инспекция бөлімі басшысының орынбасары:
– Жылу жүйесі мен ыстық су мәселесін шешу үшін 25 шақырым құбыр жөнделуі керек. Бірақ, мұны бір жазда істеу мүмкін емес. Сондықтан оның 4 шақырымы биылғы жылдың еншісінде.
Айта кетсек, былтыр қала бойынша 700-ге жуық апаттық жағдай болған. Ал, биыл қыс қытымыр мінезін көрсетпеді ме, көрсеткіш әлдеқайда төмен. Енді тек, әкім уәдесінің орындалуын күтеміз дейді тұрғындар.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Павлодар #ТЭЦ #жылу_маусымы

Видео Павлодарда жылу желілерінің 90 пайызға жуығының тозығы жеткен канала Информбюро 31