Түркістанға газ тарту жұмыстары жыл соңына дейін аяқталуы мүмкін

Түркістан - облыс орталығы болғалы мұндағы тұрғындардың газға деген сұранысы да артқан. Қаланың көк түтінін азайтуға да септігі тиген. Дегенмен, тұтынушы көбейген тұста, газ қысымы төмендеп, суықта құбырларға мұз қатып, қиындық келтірген кездер де болған. Тіпті әлеуметтік желіде газ құбырынан судың атқылаған бейнежазбалары да тараған. Жағдайды жедел реттеген газ мамандары құбыр салған жеке компаниялардың кем-кетіктерін жоюдамыз деп отыр. Ең алдымен жұмысы кідірген нан зауытындағы мәселені толыққанды шештік, енді қалаға газ тарту жұмыстарын жыл соңына дейін аяқтау жоспарда бар дейді газ мамандары.
Түркістанда күн суытып, газ тұтыну біршама артқан кезде, нан шығару зауытына берілетін газ қысымының төмендеп кетуіне зауыт иелері өздері «себепкер» болған. 2013 жылы нан зауытына жеке газ желісін жүргізген кәсіпорын иелері өз құбырларына жаңа абоненттерді қосуға рұқсат берген. Нәтижесінде тек зауытқа ғана газ жеткізуге арналған құбырдан бірнеше тұтынушы газ алып, салдарынан газ қысымы күрт төмендеді, наубайхана пештеріне газ жетпей қалды. Мәселе нан зауытының газ құбырына қосылған тұтынушыларды әкімдік жүргізген газ желілеріне қайта қосу арқылы шешілді.
НАСИБА АТАЕВА, Нан зауытының директоры:
– Біздің мәселе оң шешімін тапты. Газдың қысымы да жоғарылады. Нан шығаруда ешқандай қиындық жоқ. Қалаға толыққанды жеткізіп жатырмыз. Көлемі бұрынғы қалыпқа қайта түсті. Барлық цех жұмыс істеп тұр.
Наубайханадан бөлек, қала тұрғындарын әбігерге салған тағы бір проблема - газ құбырлары қатып, газ қысымы күрт төмендеген мәселе жедел шешілді. Мамандар оның себебі осы құбырларды сапасыз салған мердігерлердің кінәсі екенін анықтаған. Құбырлардың жалғану тұсынан жаңбыр суы кірген және конденсат жиналып қалған. Қабылдап алған газ құбырларын осылай тазалап әуреге түстік деген мамандар жылдың соңына дейін Түркістанда газ тартылмаған көше қалмайтынын айтады. 2018 жылы қала бойынша газ тұтынантын бар-жоғы екі мыңнан астам абонент болса, олардың саны еселеп өскен.
ШАЛҚАР ОМАРБЕКОВ, "ҚазТрансГаз Аймақ" АҚ Түркістан филиалының директоры:
- Екі жылдың ішінде абоненттердің саны бес есеге артты деген сөз. Тоқсан пайыздан астам желілер дайын және де сол желілерге қосылу мүмкіндігі туындады деп айтуға болады.
Газ көшеге жетсе, ары қарай үйге кіргізу тұтынушының міндеті. Дегенмен, газға қатысты сұрақтарды жедел шешу мақсатында қала әкімдігімен бірге арнайы екі кеңсе жұмысын бастады. Онда өтінім беру, газға қатысты кез-келген сұрақтың жауабы жылдамдатылады деп отыр. Газ мамандары тұрғындарды газ пайдалануда сақтық шараларын қатаң сақтаңыздар дегенді де ерекше ескертіп отыр. Бұл мәселе салғырттықты көтермейтінін қайғылы статистика да анық көрсетіп отыр.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Түркістанға газ тарту жұмыстары жыл соңына дейін аяқталуы мүмкін канала Информбюро 31