Жаңа жылда үйге қонақ пен Аяз атаны шақыруға тыйым салынды

Биыл алматылықтар жаңа жылды Аяз атасыз қарсы алатын болды. Ал үйіне оннан артық қонақ шақырғандарға айыппұл салынады. Бұл Алматы қаласының бас санитария дәрігерінің талаптары. Ал ертеңнен бастап елімізде карантин күшейтілмек. Көпшілікке қойылған талап мұнымен шектелмей тұр. Мамандар жаңа жыл қарсаңында өзге де қауіптерден сақтанып жүру керектігін айтып, жұршылыққа кеңес берді.
Төтенше жағдай мамандары жаңа жыл мерекесіндегі қауіпсіздікті шыршаны дұрыс орнатудан бастау қажет дейді. Шырша үйдің төбесі мен қабырғаларына бір метр жетпей, безендірілген шамдардың кернеуі 12 вольттан аспауы керек екен. Сондай-ақ әдеттегідей отшашулардан сақ болған абзал. Өйткені өткен жылы елімізде жаңа жыл қарсаңында 15 адам сертификатталмаған отшашудан зардап шегіп, ауыр жарақат алыпты.
ЕРКІН ОТАРҒАЛЫМҰЛЫ, ТЖД Мемлекеттік өрт қауіпсіздігін бақылау басқармасының басшысы:
– Отшашуларды пайдаланған кезде пілтені қолжетімді арақашықтықта жандыру керек. Отшашуларды желді күнде пайдалануға болмайды. Отшашуларды қолданған кезде нұсқаулықта көрсетілген арақашықтықты ұстау керек, кем дегенде 20 метр ара қашықтықты сақтау керек.
Төтенше жағдай мамандары мерекелік дастарханға отырмас дұрын пеш, тоқ сымдарды дұрыстап тексеру керектігін де айтты. Өйткені бір ғана Нұр-Сұлтанның өзінде жылыту маусымы басталғаннан бері 11 адамға ыс тиіп уланған. Оның 8-і бала. Сондықтан төтеншеліктер балаларды үйде жалғыз қалдырмау керектігін айтады. Алайда жаңа жыл қарсаңында азаматтар тек ыстың иісінен емес, ішімдіктен де көп уланады екен. Наркологтар соңғы кезде жастардың араққа әуес болып бара жатқанына алаңдаулы.
ТОҚТАР ҚОЙШЫБЕКОВ, психиатр-нарколог:
– Жастардың көбі күйзелісті алкогольмен жоямыз деп өз ағзаларын улап алады. И уланған кезде күйзелісті, стрессті жоққа шығара алмайды. Ол стрессті ауырлатады. Адам қатты уланғандықтан екінші күні басы ауырады, жүрегі айниды, құсады. Қатты уланғандықтан көңіл-күйі төмендеп одан да қатты депрессияға, супдепрессияға ұшырап жатыр.
Ал күйзеліске түскен адам міндетті түрде үйде жанжал шығарып, соңы полиция бөлімшесінде аяқталып та жатады. Ішкі істер министрлігінің мәлімдеуінше, қылмыстардың 80 пайызын адам мас күйінде жасайды екен. Әсіресе, отбасылық ұрыс-керіс көбейіп, басқа да қылмыс түрлері артатын көрінеді.
НҰРДІЛДӘ ОРАЗ, ҚР Ішкі істер министрлігінің ресми өкілі:
– Статистикаға тоқталатын болсақ, өткен жылы мерекелік күндері 30-желтоқсан мен 2-ші қаңтар аралығында 25113 қылмыс тіркелген. Ал биыл мысалы желтоқсан 20-23 желтоқсан аралығында 1681 қылмыс.
Биыл полицейлердің жұмысы сәл жеңілдей түспек. Өйткені кей аймақтарда көршісіне көп адам жиналғандығы туралы хабарлаған адамдарға ақшалай сыйақы да берілмек. Ал бүгін Алматы қаласының бас санитария дәрігері мерекелік дастарханға қонақ шақырып, оннан артық адам жинағандарға айыппұл салынатынын айтты. Оған қоса, Жаңа жылдың бас кейіпкері Аяз атаны да үйге кіргізуге тыйым салынды.
Гүлназ Сайлауқызы, Дидар Елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Жаңа жылда үйге қонақ пен Аяз атаны шақыруға тыйым салынды канала Информбюро 31