Кредитке белшеден батып, қайтара алмай жатқандардың саны артып барады

Несиесін уақытылы қайтармағандардың кесірінен, банктер пайыздық мөлшерлемені көбейтпесе, түсірмейді. Осылай деген кейбір экономистер, жаңа жылдан кейін шетелдік қаржы институттары нарыққа келген соң-ақ, «қарызымызды қайта қаржыландырып аламыз»,- деген елге аса үміттенудің қажеті жоқ деп отыр. Ал қазақстандықтардың қайтара алмай жатқан несие сомасы бүгінде -1 триллион 228 миллиард теңгеден асып жығылған. Яғни, жыл басынан 1 желтоқсанға дейін қарызын уақытында төлей алмай жүргендердің берешегі 28 миллиард теңгеге көбейген.
Ұлттық банктің қарашадағы статистикасына қарасақ, кәсібі ақсап қалған ірі бизнесмендердің банк алдындағы берешегі - 279 миллиард теңге болса, шағын және орта бизнес өкілдерінің 90 күннен бері төлей алмай жүрген қарызы - 547 миллиард теңге. Пандемияның кесірінен банкрот болуға шақ тұрса да, зардап шеккен секторға жатпайтын бизнес түрлері үкіметтің қолдауына зәру екендіктерін кәсіпкерлік палатасы арқылы айтып келеді. Палата, қарызға батып, қаражатсыз қалған бизнесмендердің базынасын үкіметке жеткізгенімізбен, билік әлі үн қатар емес дейді.
АЙЫМ МЕШЕЛОВА, Алматы қаласы кәсіпкерлер палатасының Жетісу аудандық филиал директоры:
– Экономиканың ең зардап шеккен кәсіпкерлеріне 6 пайызбен субсидиялау беру жұмыстары жүргізіліп жатыр. Бірақ барлық кәсіпкерлер қамтылмай тұр. Енді Атамекен кәсіпкерлер палатасы осы тізімді кеңейту бойынша Үкіметке ұсыныс беріп отыр. Бильярд, караоке, ойын-сауық орталықтары мен мектепке дейінгі оқу орталықтары кірмей отыр.
Ал жеке тұлғалар үш айдан бері 420 миллиард теңге қарызын банкке уақытылы қайтармаған. Егер, несиені төлемейтіндердің саны азаймаса, қаржы институттары кредит беру саясатын өзгертіп, пайыздық мөлшерлемесін еселеп жібереді дейді кейбір экономистер. Сондықтан, олар, Үкімет банк пен тұтынушы арасындағы "дағдарысқа қарсы шарасын" қабылдауы қажет деп есептейді.
МАҚСАТ ХАЛЫҚ, Экономист:
– Қазіргі статистикаға қарасақ, 3 адамның 1-уі төлемей қалады екен. Тиісінше, банк мына бір қайтара алмаған адамның несиесін қалған уақытылы, сауатты төлеп жүрген адамның несиесінің үстіне үстеме ретінде пайыз қойып жатқан жағдайы бар. Неге Қазақстанда несиелердің пайызы жоғары деген сұрақтың жауабы осы. Банктер соларға жұмсаған тәуекелді басқа азаматтарға, кейін несие алушы азаматтарға беретін кезде қорқып, пайызды ұлғайтатыны да сол.
Ал дүниежүзілік сауда ұйымы аясында шетелдік банктердің жаңа жылдан кейін Қазақстанға ағылуы екі талай екен. Қаржы институттары өз активтерімен Қазақстанның нарығына келген күннің өзінде де, Ұлттық банктің базалық мөлшерлемесіне бағынышты болады дейді сарапшылар. Десе де, экономистер банктер арасында бәсекелестіктің болары сөзсіз екенін алға тартады.
Әйгерім Ердәулет, Ринат Әбілқайыров
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Кредитке белшеден батып, қайтара алмай жатқандардың саны артып барады канала Информбюро 31