Şamil Ənvəroğlu - Tənhalıq o deyil ki - Kamran M. Yunis

Tənhalıq o deyil ki,
kimsə olmaya yanında,
Tənhalıq o ki bu qədər çoxluq içində başını dizinə qoyub rahatca ağlaya biləcəyin,
bu gün ən zəif yerini bilib də,
sabah elə o həmin yerdən səni vurmayacaq bir kimsən yoxdur yanında.
Tənhalıq o ki
arzun arzusu,
ümidin ümidi,
səbəbin səbəbi olan kimsə yoxdur yanında...
Sevmək o deyil ki,
təkcə əllərindən tutmağı,
sarılıb öpməyi,
çılğınca sevişməni arzulayasan.
Sevmək o ki
onun adını duyanda yenidən doğulasan bu dünyaya
yenidən,
yenidən hər gün bir daha sevəsən o hər kəsin saydığın insanı.
Dünyan sadəcə ondan ibarət deyilsə,
dünyanı aydınlatmırsa SEVGİ adlı günəşin,
nə yaşayıb nə gördün ki,sən?
Ölmək o deyil ki,
büküb atalar bir boşluğa,
sən də zamanla yox olasan bir ovuc torpaq şəklində.
Ölmək o ki insan olmaqdan çıxıb olursan bir əşya,ya da nəsə.
Ya bıçaq olarsan ümidlər doğrayan,
ya qazan olarsan nifrət qaynadan,
ya da gedər səndən səni SƏN edən hər şey,
qalar səndən geriyə yeriyən bir daş parçası,
hər gün öz ayağına dolaşa-dolaşa,
hər gün öz başına düşə-düşə.
Nəyi qaldı ki,
İNSAN olmaqdan çıxanların?

Видео Şamil Ənvəroğlu - Tənhalıq o deyil ki - Kamran M. Yunis канала Kamran M. Yunis