Өте қалталы кәсіпкерлер табыстарының үш пайызын «Қазақстан Халқына» қорына аударуға міндетті

«Қазақстан халқына» қорына жиналған ақша 100 миллиард теңгеге жуықтап қалды. Ресми мәліметке қарағанда, 29 қаңтарға дейін қорға 93 миллиардтан астам қаражат түскен. Оған, Болат Өтемұратов 10 миллиард теңге, Данияр Әбілғазин 500 миллион, Нұрлан Смағұлов 1 миллиард, "Халық" қайырымдылық қоры 12 миллиард аударған. Күн сайын өзге де Қазақстанның ауқатты адамдары Қорға қаражат жіберіп жатыр. Енді, өте қалталы кәсіпкерлер салық салынатын табыстарының 3 пайызын жарна ретінде қорға аударып отырады.
Қорға "Самұрық-Қазынаға" қарайтын ERG компаниясы 30 миллиард теңге, Қазақмыс пен Қазминералс компаниясы бірлесе 25, Болат Өтемұратов 10 миллиард, "Қазцинк" компаниясы 13, "Билайн" 2 миллиард, Тимур мен Динара Құлыбаевтардың "Халық" қайырымдылық қоры 12 миллиард аударған. Ал, Вячеслав Ким мен Михаил Ломтадзе бірлесіп 10 миллиард салған. Кемінде 1 миллиард теңге аударған азаматтардың ішінде Кеңес Рақышев пен Әсел Тасмағамбетова, Нұрлан Смағұлов та бар. Жеке азаматтардан бөлек, Халық Банк қорға 3 миллиард, Банкцентркредит 200 миллион теңге бөлген. Назарбаев қоры 500 миллион, Астана Моторс компаниясы 550, Базис Констракшн компаниясы 400 миллион аударған. Қордың баспасөз қызметі 29 қаңтарға дейін бас-аяғы 93,3 миллиард теңге түскенін мәлімдеді.
Қорға ақша аудару 16 қаңтардан басталды. Қор қайырымдылық мақсатында ашылғандықтан, ақша жіберу ешкімге міндеттелмейді. Алайда, Президент Қасым-Жомарт Тоқаев қор тұрақты жұмыс істеп тұруы үшін Үкіметке ең алпауыт компаниялар мен ең ауқатты кәсіпкерлерге жылдық жарна бекітуді тапсырды. Мемлекет басшысы енді ең ауқатты кәсіпкерлер салық салынатын табысының үш пайызын жарна ретінде қорға аударып отыратынын айтты. Дегенмен, Президент бұл бастаманы елемей отырғандардың да барын атап өткен еді.
ҚАСЫМ-ЖОМАРТ ТОҚАЕВ, Қазақстан Республикасының Президенті:
– Вместе с тем, некоторые заметные в бизнесе персоны, которые являются частью олигополии и даже ее олицетворением, не спешат участвовать в благотворительной акции, инициированной Главой государства. Это что: жадность, нигилизм, разгильдяйство или пренебрежение?
Жиналған қаражат денсаулық, мәдениет пен спорт саласына бағытталмақ. Қанша ақша, қай кезде, қайда жұмсалады, кімнен қанша сома келіп түсті? Қордың барлық жұмысы ашық жүргізіледі. Айта кетейік, Форбс тізіміндегі ең ауқатты 50 қазақстандықтың отыздан астамы қайырымдылыққа ақша аударған. Ал, мемлекет басшысы Қасым-Жомарт Тоқаев бұған дейін "Қазақстан байлығының тең жартысынан астамы бар-жоғы 162 адамның қолында" деп мәлімдеген еді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ҚазақстанХалқына #қор #қайырымдылық

Видео Өте қалталы кәсіпкерлер табыстарының үш пайызын «Қазақстан Халқына» қорына аударуға міндетті канала Информбюро 31