Шенділердің салғырттығының кесірінен бүтін бір ауыл су астында қалды

Павлодар облысының тұрғындары да осы еріген қар суының зардабын тартып жатыр. Бір ғана Рождественко ауылында сай-саладан аққан су отыздан астам ауланы басып, тұрғын үйлердің ішіне кірген. Соның салдарынан баспаналардың қабырғалары сөгіліп, жиһаздар жарамсыз болып қалған. Ал биліктегілер бүтіндей бір елдімекенді әбігерге салған тасқынды күтпепті. "Павлодар ауданы су басатын аумаққа жатпайды" деп жайбарақат отырған. Енді міне сол салғырттықтың соңы бізді әуре-сарсаңға салды дейді тұрғындар.
Бұл бейнежазбаны үй иесі Анастасия Остапенко өзі түсірген. Баспанасына кірген қар суының тереңдігі балтырдан асады. «Жыл сайын көретін күніміз осы деген тұрғын, несиеге алынған жиһаздарының түкке жарамай қалғанына ашынып отыр. Суға толған тамның да ертең пана болатына күмәнмен қарайды. Апатпен алысуға шамасы келмеген көп балалы ана, туысқандарының үйіне көшуге мәжбүр болған.
АНАСТАСИЯ ОСТАПЕНКО, Рождественко ауылының тұрғыны:
– Кешелі бері су сору жұмыстары жалғасып жатыр. Бірақ, тасқын су толастар емес. Жердің беті қатып жатқандықтан жерге сіңіп үлгермейді. Ал, ауыл көшелеріндегі жағдай да мәз емес. Елдімекеннің солтүстік бөлігінде еріген қар суы 30-дан астам аулаға жайылып, қозғалысқа кедергі келтіріп отыр.
СЕРГЕЙ ОЛЛАРЬ, Рождественко ауылының тұрғыны
– Мәселе биыл ғана пайда болған жоқ. Екі жылда бір қайталанатын көрініс. Біз жастар суды шығарып, жағдайды барынша қалпына келтіруге тырысамыз. Ал, үлкен кісілер бұл жағдайда не істейді? Әкімдер мәселе шешіледі дейді, бірақ қашан? Тұрғындар жылда осылай зардап шегіп отыра ма?
"Павлодар ауданы қауіпті аумақтар қатарына жатпайды, ол жаққа қар аз түсті" деген жауаптылар, аталмыш оқиғаға байланысты мардымды жауап айта алмады. Ал, аудан әкімі табиғи апаттарға тосқауыл бола алмаймыз деп ақталды.
ЕРЖАН ИМАНСЛӘМ, Павлодар ауданының әкімі:
– Бұл табиғи құбылыстар. Аудан аумағындағы су мен қарды ұстап тұру мүмкін емес. Өз арнасы бойынша аға береді. Біздің қазіргі мақсатымыз шығын көлемін азайтып, тұрғындар зардап шекпейтіндей жағдайға жеткізу.
Айта кетейік, су басу қаупі бар жерлер қатарына Май, Баянауыл, Ақтоғай елдімекендері ғана кірген еді. Бірақ ойда жоқта Павлодар ауданы бірінші болып судың астында қалды. Қайта су күндіз көтеріліп, тұрғындар қауіп-қатерге тосқауыл болып үлгерген.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#салғырттық #су_тасқыны #Павлодар

Видео Шенділердің салғырттығының кесірінен бүтін бір ауыл су астында қалды канала Информбюро 31