Vətən müharibəsi haqqında şeir: Tarixə yazıldı Vətən Savaşı

TARİXƏ YAZILDI VƏTƏN SAVAŞI
Dözümü poladdan bərk olan xalqın,
Amalı özünə dərk olan xalqın,
Döyüşkən qeyrətli türk olan xalqın,
Orduya çevrildi hər vətəndaşı,
Tarixə yazıldı Vətən savaşı!

Vulkantək püskürüb qalxdı ayağa,
Bir qığılcım döndü sönməz ocağa.
Türkiyə bənzəyir uca bir dağa,
Güc verib qoruyur qardaş qardaşı,
Tarixə yazıldı Vətən savaşı!

Qəhrəman oğullar dastana döndü
Ürəklər bir oldu, birgə döyündü.
Düşmənlər çatladı, dostlar öyündü,
Gördü gücümüzü o mənfur naşı,
Tarixə yazıldı Vətən savaşı!

Ruhumuz fərəhdən dönüb qartala,
Yetişdik vüsala, çatdıq amala.
Son qoyduq qarətə, bunca işğala,
Azaddır yurdumun torpağı, daşı,
Tarixə yazıldı Vətən savaşı!

Hökmü var hər sözün, hər zamanın da,
Hesablar soruldu haqq divanında.
Ordumuz dərs keçdi ər meydanında,
Silinməz düşmənin qanlı yaddaşı,
Tarixə yazıldı Vətən savaşı!

Bir vaxt Xətainin güclüydü qolu,
İndisə İlham var hünərlə dolu.
"Dəmir Yumruğ"udur haqqın simvolu,
Düşmənin bir yolluq əzildi başı,
Tarixə yazıldı Vətən savaşı!
Müəllif: Qalib Bəyməmmədoğlu

Видео Vətən müharibəsi haqqında şeir: Tarixə yazıldı Vətən Savaşı канала Bu da mənim ürəyim