Bənövşə şeiri

BƏNÖVŞƏ
Hələ qan qoxulu, bərk yuxulusan,
Varmı kökün altda ölüm, bənövşə?
Qorxuram dərməyə kolun dibindən,
Qayıdır geriyə əlim, bənövşə.

Yurdum əsir idi barbar içində,
Düşmən tələ qurub məzar içində.
Boynubükük durma gülzar içində,
Sirrini aç danış bilim, bənövşə?

İndi sən şübhəli qorxu saçırsan,
Bu ilk bahardır ki, azad açırsan.
Bəlkə sən də bizdən uzaq qaçırsan,
Ey həsrət çiçəyim, gülüm, bənövşə.

Ətrini almadım başqa çəməndə
İllərdir vüsalı gözlərəm mən də
Bu görüş günündə durmuşam gendə
Xəcalət tərimi silim, bənövşə.

Qaldırıb başını vüqarla dayan,
Qələbə ruhunun rənginə boyan.
O gözəl qoxundan de varmı doyan?
Səni vəsf eyləyər dilim, bənövşə.

Bənövşə, düşmə sən kəməndə, bəndə,
Taleyim düşməsin tələyə, fəndə.
Cismim parça-parça qalxar büləndə,
Sovrular göylərə külüm, bənövşə.

Kənardan baxmaq da yetəcək sona,
Xarıbülbüllə aç indi yan-yana.
Bahar xoş gəlibdir Azərbaycana,
Sevincə qarışıb elim, bənövşə.
Qalib Bəyməmmədoğlu
02.04.2021

Видео Bənövşə şeiri канала Bu da mənim ürəyim