Fakt va Fikr (35): Korruptsiyani yengişning 7 asosiy yöli (Prezident Şavkat Mirziyoyevga takliflar)

Коррупцияга қарши курашга, хусусан, мана шу 7 йўлни босиб ўтишга бел боғлаган раҳбарга қўйиладиган муҳим бир шарт бор. Бу шарт – коррупцияга қарши курашда холис ва қатъиятли бўлиш, одам ажратмаслик, яъни бошқаларга намуна бўлиш шартидир.

Сиз ёки мен коррупция ҳақида ажойиб нутқлар, қалб ва мияларни маҳв этувчи кўрсатувлар қилсагу, лекин бу курашда ўзимиз намуна бўлмасак, одам ажратсак, нохолислик қилсак, миллат бизнинг гапларимизга ҳам кўрсатувларимизга ҳам ишонмайди.

Ҳудди ароқ ичишнинг ҳаромлиги ҳақида ваъз ўқийдиган мулла ўзи ароқ ичганини кўрган одамлар мулладан юз ўгиргани каби, одамлар сиздан ёки менда ҳам юз ўгиришлари мумкин.

Ден Сяо Пин, Ли Куан Ю ва Михаил Саакашвилилар коррупцияга қарши курашда ўзлари намуна бўлгани учунгина уларга хитой, сингапур ва грузин халқлари ишонди ҳамда эргашди. Агар коррупцияга қарши курашда улар ҳам Абдуғани Сангиновга ўхшаган яқинларини жазодан олиб қолишганида, уларга ҳам ҳеч ким ишонмас, уларга ҳам ҳеч ким эргашмас эди.

Халқлар, шу жумладан, ўзбек халқи ҳам кўр, кар ёки жинни эмас. Юқори минбарлардан туриб айтилаётган чиройли нутқларни эшитаётган миллат амалда нималар бўлаётганини кўриб турибди.

Бугун ўзбек миллати Бухородаги коррупцион ишларни фош қилган ҳуқуқуқбон Акмал Шаропов айнан Сизнинг даъватингизга эргашиб, Бухородаги коррупцион ҳолатларни фош қилгани учун қамалганини ҳам кўриб турибди.

Агар Сиз ҳақиқатдан ҳам коррпуцияга қарши кураш бошлаган бўлсангиз, шу кураш учун туҳмат билан қамалган бухоролик ҳуқуқбон Акмал Шароповни қамоқдан озод қилинг! Миллат коррупцияга қарши кураш ҳақидаги сўзларингизга ҳамда ваъдаларингизга ишонсин!

Акмал Шароповга ўхшаган ҳуқуқбон, журналист ва блогерларга Сиз: “Муаммоларни ёритинглар, танқид қилинглар. Орқангизда мен турибман!” – дедингиз. Лекин уларга дххчилар, милисалар, прокурорлар ва ҳокимлар ҳужум қилганида Сиз мазлумларнинг орқасида турмадингиз. Буни миллат кўриб турибди.

Сиз бир томондан: “Коррупцияга қарши курашиш бўйича таклифлар беринг!” - деяпсиз. Лекин бошқа томондан шу коррупциянинг бир тури ҳисобланадиган монополизмга қарши ҳеч нарса қилмаяпсиз. Тошкент шаҳар ҳокими ва йирик тадбиркор Жаҳонгир Ортиқхўжаев - ажойиб ва саҳий спонсор. Лекин у - барибир монополист. Сиз буни мендан яхши биласиз.

“Акфа”, “Артел”, “ДжиЭм” ва бошқа монополистларнинг ҳукмронлигига барҳам бериш учун импорт божларини олиб ташлаш ёки камайтириш учун бир қарор қабул қилиш шунчалик қийинми?

Наҳот-ки, ўзбек монополистларининг иқтисодий гегемониясига барҳам бериш учун “ЕвроОсиё Иқтисодий Иттифоқи” деган қуллар ташкилотига кириш шарт бўлса? Бу гегемонияга бир қарор билан ҳам барҳам берса, бўладику!

Олтин қазиб олиш бўйича дунёда бешинчи ўринда турадиган Навоий тоғ-кон металлургия комбинати АҚШ молия вазирлигининг қора рўйхатига кирган олигарх Фаттоҳ Шодиевга ҳеч қандай тендерларсиз, ҳукуматнинг битта қарори билан ишончли бошқарувга бериб юборилди. Айнан сизнинг даврингизда бериб юборилди.

Яқинда маълум бўлишича, қўштирноқ ичидаги бу “инвестор”нинг яқинлари комбинатга келгач, комбинатга инвестиция киритиш ўрнига, унинг кассасидан ўзларига 25-50 минг доллардан ойлик маош ёзиб ола бошлашган.

Бу коррупция бўлмай, нима, жаноб президент?!

Мен Сизнинг даврингизда Ўзбекистонда коррупциянинг энг ёмон турларидан бири – непотизм, яъни таниш-билишчилик ва қариндош-уруғчилик авж олгани ҳақида гапириб ўтирмайман. Чунки қайси лавозимда қайси раҳбарнинг қариндоши ўтирганини сиз ҳам биласиз, халқ ҳам билади.

Мен: “Коррупцияга курашда ўзингиз намуна бўлинг, холис бўлинг, қатъиятли бўлинг, одам ажратманг! Курашингиз самимий эканлигини чиройли нутқлар, кескин танқидлар ёки маст қилувчи ваъдалар билан эмас, амалий ишларингиз билан ҳам кўрсатинг!” – дейман.

Нима учун сиёсий раҳбарнинг, айниқса, давлат раҳбарининг барча яхши ишларда ўрнак бўлиши муҳим шарт ҳисобланади?

Буюк ислом олими имом Ғаззолий буни оддий бир мисол билан шундай тушунтирган. Имом Ғаззолий шундай деган: “Тоғнинг тепасидан тоза сув тушса, пастдаги лойқа сув ҳам охири тозаланади. Агар тоғнинг тепасидан лойқа сув тушса, пастдаги тоза сув ҳам охири лойқаланади”.

Хуллас, жаноб президент, коррупцияга қарши кураш бўйича Сизга берадиган энг асосий таклифим шу: бу курашда ўзингиз ўрнак бўлинг, одам ажратманг!

Ҳурматли Шавкат Миромонович!

Нега мен бу аччиқ гапларни юзингизга айтаяпман?

Чунки қайсидир ҳукмдор зулм қилса ёки жуда бўлмаса хато қилса, шу зулм ва хатонинг гуноҳи нафақат ҳукмдорнинг ўзига, балки шу ишнинг зулм ёки хато эканлигини билиб туриб, ҳукмдорга айтмаган, сукут сақлаган уламога, олимга, журналистга, умуман зиёлиларга ҳам тушади.

Бу ҳақида муфтий Усмонхон Алимовдан эмас, илмлироқ ва жасурроқ бир бошқ ислом уламосидан сўрасангиз, шу гапни тасдиқлаши мумкин.

Фактларни ўрганинг ва фикр қилинг!

Бобомурод Абдулла

2021 йил 4 июнь

Видео Fakt va Fikr (35): Korruptsiyani yengişning 7 asosiy yöli (Prezident Şavkat Mirziyoyevga takliflar) канала Fakt va Fikr