Генералдар мен полковниктер де мүдделі ме, әйтеуір мал ұрлығы тыйылмай тұр

Елімізде генералдар мен полковниктер де мүдделі ме, әйтеуір мал ұрлығы тыйылмай тұр. Жыл сайын соғым уақытында одан сайын өрши түсетін қылмыстың аз бөлігі ғана ашылып, қарапайым азаматтар шаш етектен шығынға батады екен. Ал жергілікті полиция түрлі сылтаумен малды іздемей, тек жәбірленушіден түскен өтінішті қабылдап қана отыра беретін көрінеді.
Торғайлық Жанмұрат Қали 4 айдың ішінде 10 бас қарасын ұрлатып алып отыр. Үш рет полицияға арызданып барған азаматты тәртіп сақшылары бос уәдемен қайтарып жіберген. Тіпті, өзен жағасынан сойылған сиырының терісін де сүйретіп апарып көрсетіпті.
ЖАНМҰРАТ ҚАЛИ, Жангелдин ауданы, Торғай ауылының тұрғыны:
– Тегіс сол жерде түсіріп, бәрін іздерін тегіс көрді. Ал, міне, қараша айы аяқталып келе жатыр, әлі күнге дейін ешқандай сыбыс жоқ. Бізде органның адамдары, ішкі істер бөлімдері дұрыс жұмыс істей алмайды. Сол себепті осындай ұры қаралар қарапайым халықты басынып тұр.
Ал заң бойынша шаруалар малын қараусыз жайылымға жібермеуі керек екен. Тіпті, ол үшін әкімшілік жаза да тағайындалатын көрінеді. Сенаторлардың айтуынша, дәл осы заң полицияның сылтау айтуына негіз болып отыр.
ВЛАДИМИР ВОЛКОВ, ҚР Парламенті Сенатының депутаты:
– Бас прокуратураның ақпаратына сенсек, сотқа дейінгі тергеу органдары түрлі манипуляцияны пайдаланады. Соның ішінде, қылмыс түрін жеңілдетіп көрсету бар. Ал кейбірі, тіпті, малды қараусыз қалдырдың деп арызды тіркемейді.
Ал биыл мал ұрлығымен ұсталғандар мен оларға сыбайлас болған полиция қызметкерлеріне жаза қатаңдатылған еді. Енді мал ұрлағандар 12 жылға дейін бас бостандығынан айырылып, жиған-тергені тәркіленеді немесе 8 миллион теңге айыппұл төлеуі керек. Ал Ішкі істер министрлігі енді малды сақтандыру керек дейді.
ДУМАН ТАЕВ, ҚР ІІМ Криминалдық полиция департаментінің бастығы:
– Өткен аптада мүлікті қорғау бойынша 2021-2023 жылдарға арналған бағдарлама бекітілді. Оның аясында халықаралық тәжірибеге сәйкес, азаматтардың мүлкі мен малдары сақтандыру мәселесі қаралды.
Соңғы 10 айдың ішінде малын ұрлатқан азаматтар 1 миллиард теңгеге жуық шығынға батқан. Оның тек 17 пайызы ғана жәбірленушілерге қайтарылған. Ал ұрлық, әсіресе, шекара маңындағы елдімекендерде өршіп тұр. Өйткені қылмыскерлер табын-табын малды еш кедергісіз шекара асырып алып кетеді екен.
Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Генералдар мен полковниктер де мүдделі ме, әйтеуір мал ұрлығы тыйылмай тұр канала Информбюро 31