Бизнесті қолдаудың сиқы бұл

Пандемия деп онсыз да жұмыссыздар артып жатқанда Нұр-Сұлтан қаласында 40 адам нәпақасын тауып отырған тігін фабрикасы жабылғалы тұр. Карантин шектеулеріне емес, несиесін даулаған банктің шешіміне байланысты. 2 апта ішінде кәсіпкер өндіріс жүргізіп отырған нысанды босатпаса, онда сот шешіміне сәйкес мәжбүрлі түрде шығарылуы мүмкін.
Айгүл Аюпованың бизнесі үшін күресі мына ғимаратты алғаннан кейін басталған. Банкке кепілдікке қойып алған несиесі үшін 3 жыл бойы ай сайынғы 3 миллион теңгесін үзбей төлеп келіпті. Алайда, орындалған жұмысы үшін тапсырыс берушінің бірі ақшасын бермей қойғаннан кейін қаржылық қиындық басталған. Борышын қайтаруды кешіктіргені үшін банк сотқа арызданыпты.
АЙГҮЛ АЮПОВА, Тігін фабрикасының жетекшісі:
– Сот шешіміне сәйкес, олар бізге 65 миллион теңге борыш міндеттеді. Ал, менің алған несием 69 миллион теңге ғана болған. 3 жыл бойы тек олардың пайыздық үстемесін төлеген болып отырмын. Төлеген ақшам 100 миллионнан асады. Айналып келгенде қазір далада қалуымыз мүмкін.
АЙНҰР ЖҰМАҚҰЛОВА, Тігінші:
– Жабылмаса екен дейміз осы жер. Жұмыс істегіміз келеді әлі де.
Тігін фабрикасы «парламентке өтсек бизнеске көмектесеміз» деп уәде еткен Ақжол партиясының сайлауалды киімдерін де дайындап жатыр екен. Алайда, мәселенің шешілуіне мұның пайдасы шамалы іспетті.
БАҚЫТНҰР ӘЛІБАЙ, Тілші:
– Осы тігін цехында тігілген дайын бұйымдардың бәрі осы жерде. Бұның ішінде судьялардың киетін мантиясы бар, әртүрлі әскери, күштік құрылымдар, тіпті прокуратураның генералдары киетін мынадай киімі де бар екен. Бірақ, мынау жұлдыздар бұл өнеркәсіпке ешқандай басымдық бермейтін сияқты.
Нұр-Сұлтан қаласы әкімдігінің өкілдері бұл түйткілді білеміз деп отыр. Қолдан келген көмекті көрсетіп, тіпті, жеңілдетілген несие алуды немесе басқа ғимаратқа көшуді ұсындық дейді.
ЕРЛАН БАҚАЕВ, Нұр-Сұлтан қаласының Инвестициялар және кәсіпкерлікті дамыту басқармасының бөлім жетекшісі:
– Қазіргі таңда тиісті ғимарат іздеп жатырмыз. Бұл өндіріске сай келетін нысанның ауданы үлкен болғандықтан табу оңай емес. Бұл мәселе шешілсе бәрі реттеледі деп ойлаймыз.
Арызданушы «Азиякредитбанк» өкілдері осы мәселе бойынша сауалымызға әзір жауап бермеді. Ал, сот орындаушысы бүгін кәсіпкерге ғимаратты 8 желтоқсанға дейін босату туралы ескертуді табыстап кетті.
Бақытнұр Әлібай, Дидар Елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Бизнесті қолдаудың сиқы бұл канала Информбюро 31