Azərbaycan qlobal çağırışların təşəbbüskarı kimi

Dünyanın 120 ölkəsi arasında səmərəli əməkdaşlıq əlaqələrinin qurulmasında və inkişafında mühüm siyasi platforma olan Qoşulmama Hərəkatı məhz Azərbaycanın sədrliyi dövründə özünün ən uğurlu dövrünü yaşadı. Azərbaycan Qoşulmama Hərəkatına (QH) sədrliyi 2019-cu ildən etibarən üç il müddətinə həyata keçirməyə başlayıb. 3 illik sədrlik müddətində uğurlu fəaliyyəti ilə Hərəkata mühüm töhfələr verən Azərbaycanın sədrliyi təşkilata üzv ölkələrin yekdil rəyi ilə 2023-cü ilin sonunadək uzadıldı.
2 mart 2023-cü il tarixində Bakıda Qoşulmama Hərəkatının COVID-19-a qarşı mübarizə üzrə Təmas Qrupunun sammit səviyyəli görüşü baş tutdu. Görüşə 70-ə yaxın ölkənin dövlət və hökumət başçıları, yüksək səviyyəli nümayəndələri, həmçinin beynəlxalq təşkilatların rəhbərləri, eyni zamanda, nazirlər, nazir müavinləri, səfirlər və s. qatıldılar. Qeyd edək ki, bu toplantının keçirilməsi təşəbbüsü Prezident İlham Əliyev tərəfindən hələ 2021-ci ildə irəli sürülmüşdü. Bu təşəbbüs təşkilata üzv dövlətlər tərəfindən təqdir edilmişdi.
Prezident İlham Əliyev Zirvə görüşündə çıxışında Qoşulmama Hərəkatının BMT-dən sonra ikinci ən böyük beynəlxalq təsisat kimi beynəlxalq arenada daha nəzərəçarpan və səmərəli rol oynamasını, yeni dünya düzəninin yenidən formalaşmasında fəal iştirak etməsinə ümid etdiyini bildirdi. Bununla dövlət başçısı dünya düzəni və təhlükəsizliyi baxımından yeni proseslərin zəruriliyini vurğuladı. Prezident öz çıxışında yeni dünya düzəninin formalaşması fikrini ifadə etməklə əsas diqqəti dünyada sülhün və təhlükəsizliyin təmin edilməsinin vacibliyinə, beynəlxalq hüququn işləməməsinə, qlobal təşkilatların fəaliyyətinin səmərəli olmamasına yönəltdi. BMT-nin fəaliyyətinin uğursuzluğuna və ikili standartlara toxunan dövlət başçısı Təhlükəsizlik Şurasının bəzi qətnamələrinin bir neçə günə icra olunduğu halda, Azərbaycanla bağlı 4 qətnaməsinə 30 ilə yaxın dövr ərzində məhəl qoyulmadığını bildirdi, BMT sistemində islahatların aparılmasının zəruriliyinə toxundu. İlham Əliyev çıxışında iki qlobal çağırışı bəyan etdiyini vurğuladı. Bunlar Afrikanın və inkişaf edən kiçik ada dövlətlərinin pandemiyadan sonrakı bərpasını dəstəkləməkdir. Dövlət başçısı bildirdi ki, Azərbaycan ilk donor ölkə kimi hər iki qlobal çağırışa 1 milyon ABŞ dolları məbləğində vəsait ayırır.
Dövlət başçısı həmçinin Azərbaycan BMT-nin COVID-19-dan sonra Qlobal Bərpa üzrə Yüksək Səviyyəli Panelinin yaradılmasını təklif edib. Bu panel postpandemiya dövrü üçün qlobal tədbirlərə dair tövsiyələr hazırlaya bilər. Prezident Qoşulmama Hərəkatına üzv olan ölkələri bu təşəbbüsü dəstəkləməyə çağırdı.
Bakıda keçirilən bu görüşdə yüksək səviyyəli nümayəndələrin iştirakı bir daha onu göstərir ki, Azərbaycan təşkilatın fəaliyyətinə mühüm töhfələr verir. Eyni zamanda, Azərbaycanın növbəti dəfə qlobal məsələlərin müzakirə olunduğu mühüm toplantıya ev sahibliyi etməsi ölkəmizin qlobal həmrəyliyə verdiyi önəmin göstəricisidir.

Видео Azərbaycan qlobal çağırışların təşəbbüskarı kimi канала Azerbaijan Realities