Yeni Türk Əsri başlayır

Ötən bazar günü keçirilən seçkilərdə qardaş Türkiyə xalqı öz seçimini etdi. Türkiyədə keçirilən ikinci tur prezident seçkilərində Rəcəb Tayyib Ərdoğan 52,14 səslə qalib gəldi. Bir çox beynəlxalq siyasi mərkəzlər, siyasi şərhçilər bu seçkinin ən çətin sınaqlardan biri olduğunu bildirdilər.
Türkiyənin qlobal güc olmasını nəzərə aldığımız zaman bu seçkilərin ciddi geosiyasi nəticələrinin də olacağı məlumdur. Bu qələbəni eyni zamanda türk dünyasının qələbəsi də hesab etmək olar, çünki Ərdoğanın rəhbərliyi ilə məhz Türkiyə türk dövlətləri arasında iqtisadi əlaqələrin inkişafında, siyasi münasibətlərin qurulması və inkişaf etdirilməsində başlıca rol oynayır.
Prezident Rəcəb Tayyib Ərdoğanın hakimiyyəti illərində Türkiyədə çox mühüm islahatlar həyata keçirilib. Qardaş Türkiyənin düzgün şəkildə apardığı iqtisadi siyasət hər bir sahədə sürətli şəkildə inkişafa imkan yaradıb. Məhz bu uğurlara görə qardaş Türkiyə xalqı yenidən Rəcəb Tayyib Ərdoğanı prezident seçdi.
Son illər qardaş ölkənin iqtisadiyyatında müşahidə edilən volatilliyə, məzənnə enişlərinə və inflyasiyaya rəğmən Türkiyə iqtisadiyyatı son 20 ildə real ifadədə 3 dəfə böyüyüb. 2003-cü ildə 314 milyard dollar Ümumi Daxili Məhsula malik olan Türkiyə iqtisadiyyatı indi 900 milyard dollardan böyükdür. Beynəlxalq Valyuta Fondunun hesablamalarına görə, bu il Türkiyədə ÜDM-in 1 trilyon 29 milyard dollara çatması gözlənilir. Bu isə o deməkdir ki, bu il Türkiyə trilyon dollarlıq iqtisadiyyata malik ölkələr qrupuna daxil olacaq.
Prezident İlham Əliyev Rəcəb Tayyib Ərdoğanı ilk təbrik edən lider oldu. Bu hadisə Türkiyə mediasında da geniş işıqlandırıldı. Bütün sahələrdə olduğu kimi, bu qələbədə də qardaş türk xalqını və onun liderini ilk təbrik edən də Azərbaycan oldu. Qələbənin gecəsi Türkiyədə olduğu kimi azərbaycanlılar da küçərələrə çıxaraq qələbə yürüşləri etdilər.
Türkiyə ilə Azərbaycan arasında tarixi dostluq və qardaşlıq, səmimi münasibətlər, yüksək səviyyəli əməkdaşlıq əsasında qurulan əlaqələrin möhkəmləndirilməsi üçün daim Prezident İlham Əliyev və Prezident Rəcəb Tayyib Ərdoğan tərəfindən çoxşaxəli tədbirlər həyata keçirilib. Rəcəb Tayyib Ərdoğanın seçkilərdə qələbəsi iki qardaş ölkə arasında münasibətlərin daha da möhkəmlənməsində yeni bir dövrün başlanğıcıdır.
Bu seçkilər Türkiyəni parçalamağa çalışan və onu bataqlığa çəkməyə cəhd edən dairələrə də ciddi mesaj oldu. Türk xalqı bir olduğunu və Ərdoğanı dəstəklədiyini bütün dünyada bəyan etmiş oldu.
Türkiyə Azərbaycanın haqq işinə hər zaman dəstək verən ölkələrdəndir. İstər Vətən müharibəsində, istərsə də Qarabağ və Şərqi Zəngəzurda quruculuq prosesində Türkiyənin dəstəyi hər zaman hiss edilib. İşğaldan azad olunan ərazilərimizdəki hər iki beynəlxalq hava limanının açılışında, Zəngəzur dəhlizinin Azərbaycan hissəsinin təməlqoyma mərasimində Azərbaycan və Türkiyə prezidentlərinin iştirakı və eləcə müttəfiqlik bəyannaməsinin Şuşada imzalanması da bunları təsdiq edir. Bu isə o deməkdir ki, Ərdoğanın yenidən seçilməsindən sonra iki ölkə arasında birgə strateji əməkdaşlıq daha da dərinləşəcək. Bütövlükdə, Türkiyədə seçkinin nəticələri region üçün də əhəmiyyətli idi. Ərdoğanın yenidən prezident seçilməsi mövcud regional düzənin daha da möhkəmlənməsinə şərait yaradacaq.
Bu seçkidə təkcə Türkiyə deyil, Azərbaycan da qazandı. Bu gündən sonra əlaqələrimiz hər iki ölkə liderinin güclü səyləri nəticəsində daha da inkişaf edəcək. Biz qələbəyə inanırdıq! Yaşasın Azərbaycan Türkiyə dostluğu və qardaşlığı! Dostluğumuz və qardaşlığımız əbədi və sarsılmazdır!

Видео Yeni Türk Əsri başlayır канала Azerbaijan Realities