Өрт сөндірушілерге кедергі келтірген көліктерді соғып өтуге рұқсат беру ұсынылды

Өрт сөндірушілерге кедергі келтірген көліктерді соғып өтуге рұқсат беру ұсынылды. Мәжіліс депутаттары төтеншеліктерге жолды кесе-көлденең жапқан затты алып тастауды, керек болса шлагбаум, дарбаза, машинаны сындырып кіруді заңдастыру қажет деп санайды. Осылайша құтқарушыларға аулаға емін-еркін кіруге жағдай жасалмақ. Ал бұған халықтың өзі не дейді? Өрт сөндірушілер бүлдірген мүлікке өтемақы бола ма?
Құтқару саласында 11-ші жыл қызметте жүрген Ғалымжан Есполовтың айтуынша, дұрыс қойылмаған көліктің кесірінен кешігу бұрыннан бар мәселе. Бірақ соңғы жылдары жағдай қиындап барады. Әсіресе көпқабатты тұрғын үйлердің ауласына жетудің машақаты көп. Өрт сөндірушілерде кедергі болған машинаны алып тастайтын эвакуатор өздерінде де бар, бірақ оған кемі 15 минут кетеді. Ал бізде әр секунд санаулы дейді.
ҒАЛЫМЖАН ЕСПОЛОВ, Алматы қаласы ТЖД жедел штаб бастығы:
Жасыратыны жоқ! Тұраққа дұрыс емес қойылған көліктің кесірінен кеш қаламыз. Бүгінде оқиға орнына арнайы техниканы ертіп жүреміз. Бірақ оның өзі бізге қосымша жұмыс. Көлік тұрса, жолымызды ашумен айналысып кетеміз.
ОРАЗАЙ НҰРТАЙҰЛЫ, тілші:
Өрт сөндірушілердің айтуынша, көліктердің кесірінен аулаға кіре алмау күнделікті жағдай. Әсіресе көпқабатты түрғын үйлерге арналған осындай үлкен техникаға орын табу қиын. Айта кетейік, сатысы бар бұл көліктің өзіне кемі 100 шаршы метр жер керек.
Сол себепті де депутат Олжас Құспеков кедергі келтірген көліктерді жолдан алып тастауға, қажет болса оларды зақымдауға рұқсат беруді ұсынды. Мәжілісмен машиналарды ғана емес, шлагбаум сияқты кез келген тосқауылдарды бұзып өтуді заңдастыру қажет деді.
ОЛЖАС ҚҰСПЕКОВ, ҚР Парламенті Мәжілісінің Депутаты:
Құтқаруға кедергі келтірген болса мүлік үшін мемлекеттен өтемақы төленбейді. Сол себепті жеке тұлғалар мен бизнес үшін төтенше жағдайлардың салдарынан міндетті сақтандыру тетігін әзірлеу керек. Көлік, шлагбаум сынды тосқауылдар адам өліміне әкелмеуі тиіс.
Ал халық үйді салған кездегі көлік тұрағының талаптарын да бақылау қажет дейді.
Кедергі көліктердің мәселесі Астанада 12 сәуірге қараған түні болған қайғылы оқиғадан кейін ерекше назарға алынды. Есте болса, елордада үш баланың өмірін жалмаған жалынды өшіруге келген құтқарушылар жолда тұрған көлікпен алысып, уақыт кетірген еді.

#Информбюро #31арна #Өртсөндіруші #Құтқарушы #31канал

Видео Өрт сөндірушілерге кедергі келтірген көліктерді соғып өтуге рұқсат беру ұсынылды канала Информбюро 31