Депутаттар ойдан шығарылған өтірік атақтарға тыйым салуды ұсынып жатыр

Марапаттың қадірі қалмады. Тойдағы «үздік құдадан» басталған арзан атақ – енді қоғамға дендеп кірді. Мәжілісмен Ерболат Сатыбалды мінберден осы мәселені көтеріп дабыл қақты. Халық қалаулысының сөзінше, қазір кез келген азамат ақша төлеп, «жыл адамы», «ұлт мақтанышы» атанып шыға келеді.
Тіпті, кейбір пысықайлар «ғасыр адамы» атты энциклопедия шығарып, 300 мың теңге төлесең өзіңді де, ата-бабаңды да «алтын адамдар» қауымына қосып беретін болған. Ал ең өкініштісі бірнеше қоғамдық ұйымдар тарихи тұлғалардың атын пайдаланып, медаль мен төсбелгіні ашық саудаға салған екен. Нәтижесінде мұндай жалған марапаттардың мемлекеттік наградаларға ұқсайтыны анықталып, айыппұл салынған жағдайлар да бар. Ең қауіптісі – жалған бедел көбейіп, шынайы еңбек елеусіз қалып жатыр дейді депутат. Сондықтан енді қоғамдық марапаттарды заңмен реттеп, атаулар мен белгілерге шектеу қоюды ұсынды.
ЕРБОЛАТ САТЫБАЛДЫ, ҚР Парламенті Мәжіліснің Депутаты:
Қолданыстағы заңда «қоғамдық марапат» ұғымы нақты айқындалмаған. Соның салдарынан қоғамдық бірлестік, қауымдастық және өзге ұйымдар тағайындайтын марапат арнайы құқықтық реттеуден тыс қалып отыр. Қоғамдық марапаттарда тарихи тұлғалардың есімін және «Құрметті», «Еңбек сіңірген», «Даңқ», «Батыр», «Намыс» сияқты мәртебелі атауды қолдану жиі кездеседі. Бұл жағдай мемлекеттік наградалармен шатастыру қаупін тудырып, алаңдаушылыққа себеп болуда.

#Информбюро #31арна #БастыЖаңалықтар #Новости #31канал

Видео Депутаттар ойдан шығарылған өтірік атақтарға тыйым салуды ұсынып жатыр канала Информбюро 31