АҚШ ФУҚАРОСИ, 32 ЁШЛИ ЎЗБЕК ТАДБИРКОРИ БОБУР ҲАСАН ЎЗБЕКИСТОНГА КИРИТИЛМАДИ!

ЖОНЛИ СУҲБАТ: НИМА УЧУН АҚШ ФУҚАРОСИ, 32 ЁШЛИ ЎЗБЕК ТАДБИРКОРИ БОБУР ҲАСАН ЎЗБЕКИСТОНГА КИРИТИЛМАДИ?
(Остонадан Бобур Ҳасан билан суҳбат)

06.08.2018

3 август, жума куни Нью-Йоркдан Тошкентга учиб борган 32 ёшли асли ўзбекистонлик тадбиркор, АҚШ фуқароси Бобур Ҳасанни Ўзбекистон Чегара хизмати Ватанига киритмади. Тадбиркор Ўзбекистонга 50 миллион долларга яқин сармоя киритиш бўйича ўзбек расмийлари билан музокара олиб бораётган бўлган.

Бобур Ҳасаннинг айтишича, расмийлар унинг лойиҳаларига катта қизиқиш билдирган, бироқ 7-8 ойдан бери унга Ўзбекистон визасини беришмаган.

19 ёшида сиёсий сабабларга кўра, 6 акаси билан Ўзбекистонни тарк этишга мажбур бўлган асли қашқадарёлик Бобур Ҳасан 13 йилдан бери Америкада яшайди. Оилали, икки фарзанднинг отаси.

Бобур Ҳасан мухолифатдаги "Бирдамлик" Халқ Демократик Ҳаракатининг асосчиси ва раҳбари, айни дамда АҚШда яшаётган таниқли сиёсатчи Баҳодир Чориев (Баҳодир Хон Туркистон)нинг кенжа укаларидан бири бўлиб, Бобур Ҳаракат сафларини 4 ярим йил аввал тарк этганини, сиёсий фаолият билан шуғулланмаганлигини биз билан суҳбатда таъкидлаб ўтди.

Ёш тадбиркор Президент Мирзиёевнинг 2018 йил 4 июлда имзолаган қароридаги имтиёз билан Ўзбекистонга киришга ҳаракат қилган.

Қарорда 101 давлат фуқароларига Ўзбекистонга 5 кунгача визасиз қолиш ҳуқуқи берилган.

Бироқ 3 август куни Москва орқали учиб келиб, 3 кундан сўнг Қозоғистон пойтахти Остонага учишни мўлжаллаган Б.Ҳасан Тошкентга киритилмади.

Чегара хизмати масъуллари унга нима учун Ўзбекистонга киритилмагани тўғрисида ҳеч қандай изоҳ бермасдан Москвага қайтариб юборишади.

АҚШдан ташқари, Туркия, Украина ва Қозоғистонда бизнес юритувчи Бобур Ҳасан Ўзбекистондаги йўлларда 2 мингдан ортиқ дўкончаси бор замонавий ҳожатхона ва автотураргоҳлар қуришни режалаштирган эди.

Режа амалга ошса 12 минг одам иш билан таъминланиши керак бўлган.

Ўзбекистонга киритилмаганидан норози бўлган тадбиркор, қиймати 50 миллион доллар бўлган бу лойиҳани Қозоғистонга амалга оширишга қарор қилган.

7 август куни Бобур Ҳасан Остона шаҳар ҳокими доҳил расмийлар ҳамда қозоқ ишбилармонлари билан мазкур лойиҳасини имзолаш мақсадида учрашув белгиланган.

Тадбиркор 8 август куни Остонадан АҚШга учиб кетади.

Хўш, нима учун Бобур Ҳасан Ўзбекистонга киритилмади?

Шу ҳақда Бобуржон билан бугунги жонли ёйинда батафсил суҳбатлашдик.

*****
Дастур давомийлиги: 73 дақиқа 14 сония

Ziyo NUR студияси маҳсулоти

Муаллифлик ва бошқа ҳуқуқлар Ziyo NUR студиясига тегишли

Суҳбатни Норвегиядан журналист Улуғбек Бакир олиб борди

E-mail: ubakirov@gmail.com

Видео АҚШ ФУҚАРОСИ, 32 ЁШЛИ ЎЗБЕК ТАДБИРКОРИ БОБУР ҲАСАН ЎЗБЕКИСТОНГА КИРИТИЛМАДИ! канала Ziyo NUR