Жол құрылысының астынан адам сүйектері шыға бастады

Шымкентте жол саяси қуғын-сүргінге ұшырағандардың бейітінің үстіне салына бастады. Сталиндік репрессия жылдарынан бері бұл жер Қайтпас деп аталады екен. Бірақ құрылысшылар Қайтпаста жер қазып бастаған бетте қабірлерге кезігіпті. Ауыл тұрғындары жазықсыз атылғандар жерленген жерге тиіспеуді талап етіп, бір емес, бірнеше жылдан бері қалада әкім болғандардың есігін қаққанын айтады. Бірақ бұған мән бермеген шенеуніктер жол салуды бастауға рұқсат етіпті.
МАҚСАТ ЖАҚСЫБАЙҰЛЫ, тілші:
– Өткен ғасырдың отызыншы жылдары саяси қуғын-сүргінге ұшырағандарды тура осы екі сайдың ортасында атқан деседі. Тарихшылардың айтуынша, мұнда жүздеген адамның мүрдесі жатыр екен. Сол үшін де бұл маңды Албастысай деп атап кеткен. Ал қазір мына қолға алынған құрылыстың аясында бұл жерде талай қабір табылады деген болжам бар тұрғындарда.
Мердігерлер жұмысты бастай салысымен мынадай шұқырлар пайда болған. Оған үңіліп қараса, түбінде адам сүйектері. Мұны естіген тұрғындар қарсылық білдіріп, құрылысты бірден тоқтатты. Дереу полиция шақыртылып, қабірді аршуға кірісті. Арада 80 жыл өтсе де, қуғын-сүргінде атылған құрбандардың сүйегі сол күйі сақталған екен.
Жол салынатын жерде қабір тәріздес осындай шұқырлар өте көп. Мынадай ойпаң жерлерде де бұған дейін мүрде болғаны білініп тұр. Оның бәрін аршып алмайынша, құрылысқа жол бермейміз дейді жұрт.
ӘЛІШЕР ХАНАЛИЕВ, мердігер компанияның учаске басшысы
– Топосъемка, ген планда мазарат бар деп көрсетілмеген. Мен ештеңе өзімнен шеше алмаймын. Әзірге мен тоқтап тұрмын, жұмыс жүріп жатқан жоқ. Негізі проект берілген, проект бойынша істеп жатырмыз.
Зұлмат жылдардың шаш ал десе, бас алатын саясатын көнекөз қария Өлмесхан Жәнібеков көп естідім дейді. Мұндағы мүрделердің нақты санын сол кездегі НКВД-ның деректерін ақтарып қана айтуға болады. Қайтпас деп аты айтқандай, осында айдалған талай боздақ отбасына оралмаған. Сондықтан талай жазықсыз бабамыздың оққа ұшқанына куә киелі жерді, биліктегілер беталбаты қорламасын дейді жұрт.
ӨЛМЕСХАН ЖӘНІБЕКОВ, Қайтпас елді мекенінің тұрғыны:
– Оу, сайдың өн бойында жасырын жазалау орындары болды. Түн кезінде байларды, құлақтарды, сол кезде оқыған-тоқығанның бәрін халық жауы деп, түнде әкеліп, сайға түсіріп, мәшіненің фарын жағып қойып, атып, атып, атып, баяғы қазған жерлері бар емес пе, соның ішіне бәрін тастап, бетін шала жауып кете берген да.
ҚОБЫЛАН ҚОНАЙҰЛЫ, Қайтпас елді мекенінің тұрғыны:
– Киелі кісілер, бұл жерде әулие ғой мысалы. Ертең оның үстінен өтіп бара жатып, авария, ДТП-лар болып, түрлі-түрлі жағдайлар болуы мүмкін.
Тұрғындардың айтуынша, осыған дейін қаланың талай әкіміне киелі жерге жұмыс жүргізбеу туралы айтқанбыз дейді. Бірақ тапсырыс беруші құрылыс басқармасы одан мүлде бейхабар екен. Әзірге құрылысты уақытша тоқтатуға ғана пәрмен беріпті.
ШӘМІЛ АМАНҚҰЛОВ, Шымкент қалалық құрылыс басқармасының бас маманы:
– Жобалаушыға ұсыныс беріп, осындай жәйттар орын алып жатқанын айтамыз, түсіндіреміз. Жобаны мүмкіншілік болса, ауыстыруға, жылжытуға может быть қарастырамыз оны.
Қорымды қорғап қалуға тырысқан тұрғындар енді үкіметтен көмек сұрап отыр. Олар бұл жерді мемлекет қарауына алуды сұрайды. Ал мердігерлер құрылысты киелі аумақтан әрірек жалғастырса деген ниетте.
Мақсат Жақсыбайұлы, Руслан Тілеубердиев
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#репрессия #боздақтар #жол #адам_сүйектері

Видео Жол құрылысының астынан адам сүйектері шыға бастады канала Информбюро 31