Дүлей дауылдың кесірінен Тараздың бір-ақ сәтті астан-кестеңі шықты

Жамбыл облысында болған жойқын желдің салдарынан облыс орталығының 30 пайызы жарықсыз қалды. Тіпті кейбір алқаптардағы жылу желілеріне де зақым келіп, тұрғындар жылусыз отыр. Дүлей дауыл 16 мектеп, 4 балабақша мен 18 көпқабатты үйдің шатырын ұшырып әкеткен. Осыған орай мектеп оқушылары қашықтан оқуға ауыстырылды. Елуге жуық тұрғын дәрігерлер көмегіне жүгініп, жолда қалған 26 азамат қауіпсіз жерге көшірілген.
Тараздың бір-ақ сәтте астан-кестеңі шықты. Кісіні жапырақтай ұшырған жойқын жел талдарды құлатып, әлеуметтік нысандар мен көпқабатты үйлердің шатырын жұлып кеткен.
Ұшқан шатыр, құлаған теректер электр сымдарын үзіп, бірқатар шағын аудан тұрғындары жарықсыз отыр. Тіпті кейбірінде газ құбырлары бүлініп, халық жылусыз қалған.
Жарықтың жоқтығы көлік қозғалысына да әсер етті. Себебі бағдаршамдар істен шығып, көлік кептелісі пайда болды. Ал сағат 11-лер шамасында барлық мектеп оқушылары үйлеріне қайтарылып, түскі ауысым онлайн форматқа көшірілген.
ТАЛҒАТ ЖАМАЛОВ, Жамбыл облыстық білім басқармасы басшысының орынбасары:
– Қай жерде қатты жел ауытқуы болып жатыр, қай жерде қауіп бар әр білім беру мекемесі шешім қабылдап, сол балаларды екінші ауысымдағы балаларды сабақтан босатып, онлайн форматта оқытып жатыр.
Күре жолдардағы жағдай тіпті қиын. Дүлей дауыл жолдағысын жайпап, жүк көліктерін де аударып тастаған.
Кейбір аудандарда жаңбыр аралас қар жауып, арты ақ түтек боранға ұласқан. Құтқарушылар жолда қалған 26 азаматты тауып, тиісті көмек көрсетіпті. Шенеуніктер қазір шығын көлемі есептеліп жатыр деді.
АСХАТ ЕСЕНӘЛИЕВ, Тараз қаласы әкімінің орынбасары
– Жылу беруші мекеме болса да сол жаңағы электр желісіне байланысты. Сол электр жүйесінің зақымдануына байланысты біздің қаладағы кіші бес қазандық уақытша жұмысын тоқтатты.
Қазір республикалық маңызы бар «Тараз-Шымкент» және облыстық маңыздағы Талас, Сарысу автожолы жабық. Табиғи апат салдарынан түрлі дене жарақаттарын алған 49 тұрғын дәрігерлер көмегіне жүгініпті. Науқастардың сегізі ауруханада ем қабылдап жатыр. Сондай-ақ, әзірге шығын көлемі де, кім өтейтіні де белгісіз. Ал синоптиктер жойқын жел түн ауғанша басылады деді.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Тараз төтенше_жағдай #дауыл #табиғат #табиғи_апат

Видео Дүлей дауылдың кесірінен Тараздың бір-ақ сәтті астан-кестеңі шықты канала Информбюро 31