7 миллиардқа! Ақтөбеде он төрт градус аязда асфальт төсеп жатыр

Ақтөбеде он төрт градус аязда асфальт төсеп жатыр. Оны көрген ел "қармен бірге төселген жабынды, көктемде еріп кетпесіне кім кепіл" деп отыр. Әкімдіктегілердің өздері де қарашада төселген асфальттың технологияға мүлдем сәйкес келмейтінін жақсы біледі екен. Бірақ, соған қарамастан 14 шақырым жолды жөндеуге рұқсат беріпті. Айтуларынша, қазір қазынадан 7 жарым миллиард теңге бөлініп жасалып жатқан жол тек уақытша.
Түнделетіп жанталасып қар үстіне асфальт төсеп жатқан жұмысшылардың әрекеті ақтөбеліктердің ашуын келтірді. Тұрғындар әкімдік өкілдері осындай сапасыз жұмыстарға көз жұма қарайтынын айтады. Соның салдарынан, жаңа төселген жол жылға жетпей шұрқ тесіледі. Ал, ала жаздай тындырмаған тірліктерін, аязды күні қауырт бітіруге тырысқан әкімдіктегілер бұл жолдың талапқа сай емес екенін өздері де біліп отыр. Көше қазылып қойған соң, көлік жүргізушілеріне кедергі келтірмес үшін жұмысты бастап кеттік дейді.
АЙБЕК ҚАЙЫР, Ақтөбе облысы жол басқармасының басшысы:
– Геосеткамен астының негіздемесін дайындап қойған болатын. Сол негіздемесін жоғалтпау үшін бүгінгі күнге уақытша қара щебень салынды. Салынған қара щебень көктемде қайтадан алып тастаймыз да жаңадан дұрысын саламыз. Технологияны сақтап жол қайта салынады.
Әкімдік уақытша жолдың өзіне бюджеттен 7 жарым миллиард теңге бөлген екен. Осынша қаржыға төселген асфальт көктемде алынып, орнына технологияға сайы төселеді. Бірақ, ол кезде барлық шығынды мердігерлер өз қалталарынан шығарады дейді шенеуніктер. Ал жолдың сапасын бақылайтын мамандар ауа райы 14 емес, тіпті нөл градустан төмен болса асфальт төсеуге мүлдем болмайтынын айтады. Сондықтан, қыста мұндай жұмыстарды тоқтату керектігін айтып, Ақтөбедегі жол салумен айналысатын барлық мердігер компанияларға 3 ай бұрын ескерту жіберген екен.
РАФИС ЗИНЕТОВ, «Жол активтерінің ұлттық сапа орталығы» Ақтөбе филиалының зертхана меңгерушісі:
– Біз қыркүйек айында барлық тапсырыс беруші мен мердігер компанияларға ескерту жібердік. Талап бойынша асфальт күн жылы, қар-жауынсыз кезде төселу керек. Мұндай жұмыстар кем дегенде бес градус жылылықта жасалуы тиіс.
Ал, 2018 жылы жобаланған, қыста да төселіп жатқан 14 шақырым жолды жөндеу жұмыстары келесі жылы толық аяқталуы тиіс.
Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Ақтөбе #асфальт #қауіпті_жол #тендер #әкімдік

Видео 7 миллиардқа! Ақтөбеде он төрт градус аязда асфальт төсеп жатыр канала Информбюро 31