Бокс. Чемпион қизга автомобиль совға қилинди

Ўзбекистон бокси тарихида илк маротаба жаҳон чемпиони бўлган Нигина Ўктамовага "Nexia 3" автомобили совға қилинди

Яхши биласиз, ўзбек бокси жаҳонда ўз ўрнига эга. Ўзбекистон ўғлонларининг жаҳон рингларидаги зафарли юришларига бутун дунё тан бериб улгурган.

Аммо тан олиш лозим, қизларимиз жаҳон ареналарида бунгача йирик мусобақаларда ғолиб бўлолмагандилар. Бунгача. 23 апрель куни ёшлар ўртасидаги жаҳон чемпионатида ушбу ноҳуш "анъана" бузилди. Польша мезбонлик қилган ёшлар ўртасидаги жаҳон чемпионатида -54 кг вазнли боксчи қизимиз Нигина Ўктамова барча рақибаларини мағлубиятга учратган ҳолда, олтин медалга сазовор бўлди ва ўзбек бокси тарихида биринчи жаҳон чемпиони унвонига сазовор бўлди.

Шу муносабат билан 26 апрель куни Ўзбекистон бокс федерациясида ўзига хос тадбир ташкил этилди. Ушбу тадбирда Ўзбекистон туризм ва спорт вазири ўринбосари Аваз Каримов, Миллий олимпия қўмитаси бош котиби Ойбек Касимов, МОҚ раиси ўринбосари ва Ўзбекистон бокс федерацияси раисининг биринчи ўринбосари Сакен Полатов, жаҳон чемпиони Нигина Ўктамова, унинг мураббийлари ва яқинлари, шунингдек ОАВ ходимлари иштирок этишди.

Тадбир давомида ўзбек бокси тарихида янги саҳифа очган жаҳон чемпиони Нигина Ўктамовага махсус совға - "Nexia 3" автомобили тантанали тарзда совға қилинди.

Видео Бокс. Чемпион қизга автомобиль совға қилинди канала Norbek Niyazov