Әлеуметтік жәрдемақы алу тәртібі өзгереді

2020 жыл аз қамтылған, көп балалы отбасылар үшін өзгеріске толы болмақ. Мемлекеттен төленетін әлеуметтік жәрдемақыларды алу тәртібі өзгереді. Атаулы әлеуметтік көмек те белгілі бір отбасыларға беріледі. Шетінен баяндайық. 1-қаңтардан бастап көп балалы отбасыларға әлеуметтік жәрдемақы 4 және одан да көп кәмелеттік жасқа толмаған баласы бар отбасының барлығына төленеді. Отбасы мүшелерінің табысы қаралмайды. Бала санына қарай 42 500 теңгеден 73 370 теңгеге дейін алады. Тіпті, бала күндізгі бөлімде оқу оқыса 23 жасқа дейін жәрдемақы алуға мүмкіндік бар. Өңірде атаулы әлеуметтік көмек 1-сәуірден бастап берілді. Алғашқы айда қаржылай көмекті 14500-ден астам ақтөбелік алған. Қазір олардың саны 6 есеге артыпты. Яғни, облыстың 88 200-ден көп тұрғыны осы көмекті алып отыр. 8,9 млрд. теңге төленеді. Дегенмен, сәуірден бері табыс, кірістерін жасырып, жұмыс берушілерінен жалақыларын азайтып көрсетуді сұрап, атаулы әлеуметтік көмек алғандардың саны 3500-ға жуық. Арасында кәсіпкерлер көп. Оны жауапты мамандар еңбекті дамыту орталығының электронды базасы арқылы анықтаған. Бүгінге дейін 13 млн. теңгеден астам қаржы қайтарылған. Атаулы әлеуметтік көмек 2020 жылы да беріледі. Тек мемлекеттің көмегіне нағыз мұқтаж отбасыларға ғана тағайындалады. Дегенмен, отбасындағы еңбекке қабілетті жандар жұмысқа тартылатын болады. Ал егер ұсынылған жұмыстан бас тартқан жағдайда атаулы әлеуметтік көмек тоқтатылады. Көп балалы, аз қамтылған отбасылардың балабақша, мектепке баратын балалары үшін де жағдай жасалады. Келесі жылдан бастап көп балалы отбасылар үшін міндетті кепілдендірілген пакет енгізіледі. Балалары тегін тамақтанып, киім-кешекпен қамтылады, қоғамдық көліктерде тегін жүру құқығына ие болады. Көп балалы отбасылардың балалары үшін мектептер мен балабақшаларда қазір де жағдай жасалып жатыр дейді мамандар. Мектепке дейінгі ұйымдарда 1626 балаға 70 пайыз жеңілдік жасалған. Мектептерде тегін ыстық тамақпен қамтылып жүр. Атаулы әлеуметтік көмек алатын отбасылардың 13 мыңға жуық баласы тіркелген. 9 мыңдайы көп балалы отбасылардың балалары.

Сайт телеканала http://www.rikatv.kz/
Twitter https://twitter.com/rika_kz
Вконтакте https://vk.com/rikatv

Видео Әлеуметтік жәрдемақы алу тәртібі өзгереді канала РИКА ТВ